Ձեր վստահելի աղբյուրը

Այսօր Ոստիկանության գլխավոր վարչության շենքի մոտ բողոքի ակցիա էր. «Ոչ թալանին» նախաձեռնությունը պահանջում էր, որ ոստիկանության ավագ լեյտենանտ Արթուր Վարդգեսյանը (Քաղաքացուն ապտակած ոստիկանի լիազորությունները դադարեցվել են) գա և հրապարակային ներողություն խնդրի 67-ամյա Հակոբ Նազարյանից, ում նախօրեին Հանրապետության հրապարակում «Ոտքի Հայաստան»-ի հանրահավաքի ժամանակ ապտակել էր:

Ակցիային մասնակցում էր նաև Հակոբ Նազարյանը: Լրագրողների հետ զրույցում նա ասաց. «Ուզում եմ, որ այդ մարդը դատվի: Բողոքս արդեն ներկայացրել եմ: Մինչև վերջ տանելու եմ այս գործը, որ ինքը պատասխանատվության ենթարկվի: Հարվածից հետո ականջս 70 տոկոսով չի լսում»:

Հիշեցնենք, որ այսօր դեպքին արձագանքել էր նաև ՄԻՊ-ը, ոստիկանությունում նշանակվել է ծառայողական քննություն, իսկ Արթուր Վարդգեսյանի ծառայողական լիազորությունները դադարեցվել են:

Ոստիկանության հասարակայնության հետ կապի և լրատվության վարչության պետ Աշոտ Ահարոնյանն հայտարարեց, որ ոստիկանի նման արարքը միանշանակ դատապարտելի է. «Ոստիկանությունը խոստացել էր՝ ոստիկանության կողմից ցանկացած ոչ համաչափ գործողություն համաչափ արձագանքի կարժանան»:

«Շատ վատ երևույթ է: Ես որպես մայրաքաղաքի արտաքին ծառայության պատասախանատու, մեր քաղաքացիներից, հասարակությունից այդ երևույթի կապակցությամբ ներողություն եմ խնդրում: Որպես ոստիկան նա պետք է զուսպ լիներ: Իր նկատմամբ շատ արագ օբյեկտիվ որոշում կկայացվի»,- ՀՀ Ոստիկանության գլխավոր վարչության շենքի մոտ «Ոչ թալանին» նախաձեռնության անդամներին ասաց Երևանի փոխոստիականապետ Վալերի Օսիպյանը:

Ի դեպ, Վ. Օսիպյանն ասաց, որ այդ Վարդգեսյանն այս պահին չի կարող գտնվել այստեղ, քանի վնասվածքներ ունի: Որտեղ ու երբ, ինչ հանգամանքներում է ստացել վնասվածքները՝ առայժմ մնաց անհայտ:

Հիշեցնենք՝ նախօրեին «Ոտքի Հայաստան» նախաձեռնությունը հանրահավաք էր անցկացնում Հանրապետության հրապարակում, որի մեկնարկից քիչ առաջ նախաձեռնության կազմակերպիչներից երեքը բերման էին ենթարկվել: Իրենց ընկերներին ազատ արձակելու պահանջով, մասնակիցները փորձել էին փակել փողոցի երթևեկելի մասը: Ոստիկանները քաշքշել էին նստածներին, փողոցից հեռացնելու նպատակով, այնուհետև ոստիկաններից մեկը ապտակել էր կանգնած մի տարեց մարդու:

 Մանրամասները՝ տեսանյութում: 

Նախորդող հրապարակումներ՝
Քաղաքացուն ապտակած ոստիկանի լիազորությունները դադարեցվել են
ՄԻՊ-ը վարույթ է սկսում ոստիկանի կողմից երեկ բռնություն կիրառելու փաստով