Ձեր վստահելի աղբյուրը

Արարատի մարզի մի քանի գյուղերի՝ Ոսկետափ, Նոյակերտ, Եղեգնավան, Տափերական, Լուսառատ, Փոքր Վեդի ու հարակից այլ գյուղերի բնակիչները խաղողով բեռնված մեքենաներով փակել են միջպետական նշանակության ճանապարհը: Գյուղացիների խաղողը մթերողները չեն ընդունում, պատճառաբանելով, որ բերքը վատորակ է:

Panorama.am-ի հետ զրույցում Լուսառատ գյուղի բնակիչներից Գևորգը պատմեց, որ երկու օր լուսացրել է Մասիսի գործարանի դիմաց: Հետո բերքը հանձնելու հերթն իրեն է հասել:

«Մի երկու ճութ փչացած խաղող տեսան, ասում են՝ չեն ընդունում: Բայց ես հո սեղանի խաղող չեմ քաղել, գործարանի խաղող եմ քաղել: Շողշողան խաղող է, անցած տարի սրանից մի քանի անգամ վատն էր խաղողը, իրար հերթ չտալով ընդունում էին»,-ասաց արարատցի հողագործը:


Գյուղացիներից խաղողը մթերել հրաժարվել են նաև Այգեստանում, Տափերականում, Այգեվանում, Շահումյանում ու այլ համայնքներում գործող վերամշակող ընկերությունները:

«Գարնանից մինչև էս պահը տանջվել, չարչարվել ենք: Բերքը հավաքել ենք, ասում են՝ տարեք թափեք: Մի քանի օր կանգնացնում են գործարանի առաջ, խաղողը որակը գցում է, քաշը գցում է: Գործարանների աշխատողներն էլ արդեն սկսել են փող աշխատել, թե փող տվեք հերթն առաջ գցեք, ձերը շուտ ընդունենք»,-դժգոհեցին գյուղացիները:

Այս պահին գյուղացիների հետ բանակցություններ են վարում մարզպետարանի ներկայացուցիչները, այնտեղ են գյուղատնտեսության փոխնախարարները, սակայն գյուղացիները պահանջում են հանդիպում կառավարության ղեկավարի հետ:

Կառավարությունից Panorama.am-ին հայտնեցին, որ բողոքող գյուղացիների հետ հանդիպման է մեկնել Հովիկ
Աբրահամյանը:

Նախորդող լուր՝

Եթե խաղողի մթերման հետ կապված խնդիրներ լինեն, կառավարությունը կաջակցի. վարչապետ