Ձեր վստահելի աղբյուրը

«Հայաստանում վերջին տարիներին ներդրվել են հեռահար կառավարման գրեթե բոլոր համակարգերը, որոնք առկա են աշխարհում՝ ինտերնետային, բանկային, հեռախոսային, բջջային, ինքնասպասարկող ծառայություններ: Հարցն այն է, թե ինչքանով են դրանք մեծ տարածում գտել հաճախորդների շրջանում»,-Ամերիաբանկի կողմից կազմակերպված «Հիմնավորված է արդյոք հեռահար բանկային ծառայությունների տարածումը Հայաստանում» թեմայով պանելային քննարկման ժամանակ լրագրողների հետ զրույցում ասաց Ամերիաբանկի տնօրինության անդամ, Մանրածախ գործառնությունների գծով տնօրեն Արման Բարսեղյանը:

Նրա խոսքով, հեռահար կառավարման համակարգերի լայնամասշտաբ օգտագործումը Հայաստանում այլընտրանք չունի, քանի որ նոր սերունդը, հատկապես երիտասարդությունը հետագայում հիմնականում օգտագործելու է հենց այդ համակարգերը:

«Ժամանակի հարց է, և մեր երկրում բանկային հիմնական ծառայություններից օգտվելու միջոցը դառնալու են հեռահար կառավարման համակարգերը»,- նշեց Ա. Բարսեղյանը:

Պատասխանելով հարցին, թե ինչո՞ւ այժմ դեռևս մեծ տարածում չեն գտել հեռահար կառավարման համակարգերը, նա նշեց, որ խնդիրը ոչ ռիսկերն են, ոչ էլ տեղեկացվածությունը. «Հայաստանում, հիմնականում մարզերում, քիչ են տարածված հեռակառավարման համակարգերը: Դա կապված է մի շարք հանգամանքներով, նախ և առաջ բնակչության բարեկեցության մակարդակով: Մի ամբողջ խավի համար գուցե հասանելի չեն այդ ծառայությունները, գուցե ընդհանրապես բանկային ծառայությունները հասանելի չեն: Սա էլ ժամանակի հարց է և մարզերում էլ ժամանակի ընթացքում կդառնան մատչելի:
Երևանում բավականին լավ տեմպերով անընդհատ օգտագործման տարածվածությունն աճում է»:

Ամերիաբանկի մանրածախ գործառնությունների գծով տնօրենն ասաց, որ իրենց բանկում հաճախորդների 15-20 տոկոսն է օգտվում հեռակառավարման համակարգերից: 

Ինչ վերաբերում է հարցին, թե ի՞նչ են տալիս հեռակառավարման համակարգերը և բանկին, և հաճախորդին, նա նշեց. «Գլխավոր հանգամանքը միայն այցելությունների կրճատումը չէ: Բանկերի համար որևէ խնդիր չկա մասնաճյուղերում սպասարկելը, ինչը նաև ևս մեկ հնարավորություն է շփվել հաճախորդի հետ, բացահայտել որոշակի նոր կարիքներ և փորձել բավարարել: Հաճախորդի տեսանկյունից նայելով՝ հաճախորդը ցանկացած պահի, ցանկացած վայրում, կարողանում է վերահսկել իր բանկային հաշիվները, օգտվել բանկային ծառայություններից, կարիք չունի ինֆորմացիա ստանալու, որևէ գործառնություն կատարելու համար այցելել բանկ: Ըստ էության՝ բարելավում է հաճախորդների սպասարկման որակը, խնայում է հաճախորդի ժամանակը, բանկերի համար ավելի քիչ ծախսեր են, ինչը ենթադրում է ավելի ցածր սակագներ, տոկոսադրույքներ հաճախորդների համար»:

Խոսելով ռիսկերի մասին, Արման Բարսեղյանն ասաց, որ բանկային տեխնոլոգիաների զարգացմանը զուգընթաց հաքերները փորձում են նոր միջոցներ, տեխնոլոգիաներ կիրառել, սակայն վիճակագրությունը ցույց է տալիս, որ Հայաստանում նմանատիպ խարդախությունների ծավալը ցածր է, քանի որ մեծածավալ էական դեպքեր չեն գրանցվել, բանկերի գերակշիռ մասը պատշաճ ապահովության միջոցներն ապահովում են: