Ձեր վստահելի աղբյուրը

ԵԱՀԿ Մինսկի խմբի համանախագահները Հայաստանի և Ադրբեջանի միջև հրադադարի համաձայնագրի կնքման 20-ամյակի կապակցությամբ համատեղ հայտարարություն են տարածել, որով կոչ են արել տարածաշրջանի ժողովուրդներին մտորել վերջին երկու տասնամյակի ժառանգության շուրջ:

«Այդ համաձայնագիրը վերջ տվեց իսկական պատերազմին, կանգնեցրեց նախորդ տարիների ողբերգական բռնությունը և հիմք դրեց բանակցությունների համար, որոնք կողմերին խաղաղության ուղի հարթեցին: Ձեռք բերված հրադադարի շնորհիվ հայերի և ադրբեջանցիների նոր սերունդ աճեց, որը չի տեսել պատերազմի սարսափները: Կողմերը պետք է անեն հնարավորը՝ պաշտպանելու ապագա սերունդներին նման դառը փորձից»,- ասված է հայտարարության մեջ:

Համանախագահները միաժամանակ փաստել են, որ հրադադարի համաձայնագիրն, այնուամենայնիվ, չի լուծել ԼՂ հակամարտությունը:

«Լեռնային Ղարաբաղի հարակից շրջանները շարունակում են օկուպացված մնալ և համաձայնագիրը չի ապահովել Լեռնային Ղարաբաղի կարգավիճակի լուծումը: Վերջնական կարգավորման բացակայությունը հանգեցրել է հարյուր հազարավոր մարդկանց շարունակական տեղահանությանը, միջազգային սահմաններին և շփման գծում բռնության սրացման մշտական սպառնալիքին, ինչպես նաև որոշ շրջանակների մոտ այն մոլորությանը, թե ստատուս քվոն կարող է պահպանվել անորոշ ժամանակով»,- նշել են համանախագահները:

Նրանք նաև ընդգծել են, որ կողմերը քիչ պատրաստակամություն են հայտնել օգտվել համանախագահ երկրների առաջարկած հնարավորություններից կամ քաղաքական որոշում ընդունել, որոնք անհրաժեշտ են հակամարտության խաղաղ կարգավորման համար։

«Մենք ընդհանուր դիրքորոշում ունենք այս հակամարտության հարցում և նախկինի նման հանձնառու ենք աջակցել կողմերին՝ հասնելու խաղաղ կարգավորման որքան հնարավոր է շուտ՝ ՄԱԿ-ի կանոնադրության և Հելսինկյան եզրափակիչ ակտի առանցքային սկզբունքների, մասնավորապես՝ ուժի չկիրառման, տարածքային ամբողջականության, ժողովուրդների իրավահավասարության և ինքնորոշման իրավունքի հիման վրա: Հակամարտության կարգավորումը պետք է ներառի տարրեր, որոնք նշված են համանախագահ երկրների նախագահների՝ 2009-2013թթ.-ի հայտարարությունների մեջ, որոնք ներառում են Լեռնային Ղարաբաղի հարակից շրջանների վերադարձ, Լեռնային Ղարաբաղի միջանկյալ կարգավիճակ, որը երաշխավորում է անվտանգությունն ու ինքնակառավարումը, միջանցք, որը կկապի Հայաստանը Լեռնային Ղարաբաղի հետ, Լեռնային Ղարաբաղի վերջնական կարգավիճակ, որը կորոշվի ապագայում՝ պարտադիր իրավական ուժ ունեցող կամարտահայտությամբ, բոլոր ներքին տեղահանված անձանց և փախստականների վերադարձի իրավունք և անվտանգության միջազգային երաշխիքներ՝ ներառյալ խաղաղապահ առաքելություն»,- նշել են համանախագահները:

«Նոյեմբերին մենք ականատես եղանք երկխոսության խոստումնալից վերսկսման ամենաբարձր մակարդակով: Մենք կոչ ենք անում կողմերին կառուցողական, բարեխիղճ բանակցություններ սկսել, որոնք կհանգեցնեն խաղաղ համաձայնության՝ հիմնված այդ տարրերի վրա՝ նպատակ ունենալով հասնել հակամարտության վերջնական կարգավորման: Նման կարգավորումն անհնար է՝ առանց հայ և ադրբեջանցի ժողովուրդների միջև վստահության և փոխըմբռնման: Կոչ ենք անում կողմերին իրականացնել միջմարդկային ակտիվ շփումների ծրագրեր և անվտանգության ամրապնդման միջոցառումներ՝ ամրապնդելու խաղաղ գործընթացը: Հայերն ու ադրբեջանցիները արժանի են ապրել խաղաղ և անվտանգ, և մենք պատրաստ ենք աջակցել: Կողմերը պետք է անհրաժեշտ քայլեր ձեռնարկեն խաղաղության հասնելու ուղղությամբ: Եթե նրանք այդ քայլերը ձեռնարկեն, ապա դրանք տեղի կունենան ԵԱՀԿ-ի և միջազգային հանրության լիակատար աջակցությամբ»,- եզրափակել են ԵԱՀԿ Մինսկի խմբի համանախագահները: