Ձեր վստահելի աղբյուրը

Իսպանիայի դատախազները ցանկանում են քրեական մեղադրանք առաջադրել Կատալոնիայի վարչապետ Արթուր Մասի նկատմամբ, ով իր աջակցությունն էր հայտնել Կատալոնիայի անկախացման հանրաքվեին: Մինչ այդ իսպանական իշխանությունները հայտարարել էին, որ այդ հարցումը անիմաստ գործողություն է և անպտուղ քարոզչություն:

Իրավական ուժ չունեցող հարցում

Նոյեմբերի 10-ին Կատալոնիայում տեղի ունեցած հարցման մասնակիցների ավելի քան 80 % կողմ է արտահայտվել Իսպանիայից անկախանալուն: Իսպանիայի այդ ինքնավար տարածաշրջանի 5.4 միլիոն բնակչությունից քվեարկությանը մասնակցել է ավելի քան 2.25 միլիոնը:

Իսպանիայի իշխանությունները այդ հարցումը համարում են հակասահմանադրական, քանի որ երկրի Սահմանադրական դատարանը արգելափակել էր Կատալոնիայում անկախության վերաբերյալ հանրաքվե անցկացնելու` Կատալոնիայի խորհրդարանի որոշումը:

Իր հերթին, Իսպանիայի արդարադատության նախարար Ռաֆաել Կատալան հայտարարել էր, որ այդ քվեարկությունը ոչ մի իրավական ուժ չունի և միայն պառակտում է կատալոնական հասարակությունը: 2009թ.-ից սկսած Կատալոնիայում տեղի են ունենում ոչ պաշտոնական հանրաքվեներ, որոնց ժամանակ մասնակիցների 100%-ը կողմ են քվերակում Իսպանիայից անկախանալուն:

Իսպանիայում անջատողականությունը լուրջ խնդիր է

Կատալոնիան ամենաշատ ֆինանսներն է տրամադրում Իսպանիայի բյուջեին, սակայն հետ է ստանում իսպանական այլ տարածաշրջաններից 16 միլիարդ եվրոյով ավելի քիչ: Կատալոնացիները այդ համակարգը համարում են անարդար:

Կատալոնիայի բնակչության 65 %-ը էթնիկ կատալոնացիներ են, որոնք խոսում են իրենց ազգային լեզվով: Կատալոնիան Իսպանիայում ունի ինքնավարության կարգավիճակ և իր ազգային լեզուն օգտագործում է որպես պաշտոնական, իսկ Կատալոնիայի հարաբերությունները կենտրոնական իսպանական կառավարության հետ կարգավորվում են հատուկ օրենսդրությամբ: Կատալոնիայում անջատողական տրամադրություններն այնքան խորն են, որ արտահայտվում են մեկ նախադասությամբ. «Catalonia is not Spain»:

Իսպանիան զգուշանում է անկախական և անջատողական շարժումներից երկրի տարածքում և չի ցանկանում ճանաչել Կատալոնիայի անկախությունը, քանի որ այն կարող է «դոմինոյի էֆեկտով» հանգեցնել նաև իսպանական այլ շրջանների, օրինակ Բասկերի երկրի անկախացմանը: Դա իր հերթին խնդիրներ կառաջացնի հարևան Ֆրանսիայում, քանի որ Բասկերի մի մասը բնակվում է այդ երկրի տարածքում՝Սուլ, Լաբուր և Ներքին Նավարրա շրջանում: Բասկերը, համարելով իրենց Ֆրանսիայի և Իսպանիայի սահմաններով բաժանված ժողովուրդ, ցանկացել են վերամիավորվել և ստեղծել իրենց անկախ պետությունը: Տարիներ շարունակ Բասկերի անկախության օգտին է պայքարում ԷՏԱ ահաբեկչական խմբավորումը:

Շոտլանդիայի օրինակը կարող էր նախադեպային լինել Եվրոպայի համար

Շոտլանդիայում կայացած անկախության հանրաքվեն ցույց տվեց, որ շոտլանդացիների մեծամասնությունը ցանկանում է մնալ Մեծ Բրիտանիայի կազմում և շարունակել պահպանել 307 տարվա միասնականությունը Լոնդոնի հետ:

Ընտրությունների արդյունքները ցույց են տվել, որ Շոտլանդիայի անկախությանը կողմ է արտահայտվել քվեարկողների գրեթե կեսը, իսկ անկախությանը դեմ արտահայտվողների թիվը նախնական արդյունքներով, հասնում է 54%-ի: Դա նշանակում է, որ անկախացման կողմնակիցների և Մեծ Բրիտանիայի միասնականության պահպանման կողմնակիցների ուժերը և հաղթելու հնարավորությունները գրեթե հավասար էին: Մեծ Բրիտանիայի ֆինանսների նախարարության գնահատմամբ, Շոտլանդիայի անկախությունը Լոնդոնի համար կարող է արժենալ 2.5 միլիարդ դոլար:

Շոտլանդիայի անկախության կողմնակիցները հայտարարել են, որ Մեծ Բրիտանիայից անկախանալու դեպքում իրենք նավթագազային հատվածի շնորհիվ կկարողանան ապահովել շոտլանդացիների բարեկեցությունը: Փորձագետների կարծիքով, Շոտլանդիայի նավթի պաշարները կազմում են 23 միլիարդ բարել: Սակայն անկախության դեպքում հարցեր կառաջանան Շոտլանդիայի և Մեծ Բրիտանիայի միջև՝ ծովում գտնվող հանքավայրերը բաժանելու հետ կապված: Այս պահի դրությամբ Շոտլանդիայի մեկ շնչին բաժին ընկնող ՀՆԱ-ն կազմում է 20.873 ֆունթ սթեռլինգ, իսկ Մեծ Բրիտանիայում՝ 20.571:

Շոտլանդիայի անկախության պարագայում Լոնդոնը պետք է այդ երկրի տարածքից դուրս բերի իր ատոմային մարտագլխիկները, իսկ այդ գործողության վրա բրիտանական իշխանությունները կծախսեն 4.2-5.9 միլիարդ դոլար:

Մեծ Բրիտանիայի ամբողջ միջուկային զինանոցը տեղակայված է սուզանավերի վրա, որոնց տեղակայման վայրը Շոտլանդիայի Կլայդ ռազմակայանն է: Այն գտնվում է Շոտլանդիայի արևմուտքում՝Գլազգոյից 40 կմ հեռավորության վրա:

Հենց Կլայդում են տեղակայված բրիտանական 4 ատոմային սուզանավերը, որոնք կրում են Trident միջուկային մարտագլխիկներով հրթիռներ:

Արտյոմ Բալասանով, վերլուծաբան