«Ստոր քաղաքական սպանություն». Միջազգային արձագանքը Բորիս Նեմցովի սպանությանը

Հասարակություն 14:20 28/02/2015

Եվրոպական Միությունը ակնկալում է, որ ռուս ընդդիմադիր գործիչ Բորիս Նեմցովի սպանության գործի քննությունը կկատարվի արագ ու անաչառ: Այդ մասին նշվում է ԵՄ ներկայացուցչի տարածած հաղորդագրության մեջ, գրում է ТАСС-ը:

«Մենք խորապես ցնցված ենք կատարվածով: Մեր մտքերն այսօր սպանվածի մերձավորների ու հարազատների հետ են: Կոչ ենք անում արագ ու անաչառ քննություն իրականացնել և ակնկալում ենք, որ հանցագործները կհայտնաբերվեն ու արժանի պատիժ կստանան»,- նշվում է հաղորդագրության մեջ:

Ռուսաստանում ընդդիմադիր գործչի սպանությունը դատապարտել են նաև միջազգային տարբեր քաղաքական գործիչներ. Ֆրանսիայի նախագահ Ֆրանսու Օլլանդը համարել է դաժան սպանություն, Գերմանիայի Կանցլեր Անգելա Մերկելը «ստոր սպանություն» որակելով, կոչ է արել արդար քննություն իրականացնել:

«Այս քաղաքական սպանությունը վկայում է երկրում տիրող ատելության մասին: Ես ապշած եմ ռուս քաղաքական գործչի սպանության փաստով»,-հայտարարել է Եվրոպայի խորհրդի գլխավոր քարտուղար Թյորբյորն Յագլանդը՝ ցավակցելով Նեմցովի հարազատներին ու մտերիմներին:

Կատարվածը դատապարտել է նաև ԱՄՆ նախագահ Բարաք Օբաման:

«ԱՄՆ-ն դատապարտում է Բորիս Նեմցովի դաժան սպանությունը: Մենք կոչ ենք անում ռուսական կառավարությանը իրականացնել անհետաձգելի, անաչառ քննություն և հասնել նրան, որ մեղավորները պատժվեն», -նշվում է ԱՄՆ Անվտանգության խորհրդի Twitter-ի միկրոբլոգում:

Հիշեցնենք՝ ընդդիմադիր քաղաքական գործչի սպանության ժամանակ ուկրաինացի ֆոտոմոդել Աննա Դուրիցկայան նրա հետ է եղել: Բորիս Նեմցովի սպանության փաստի առթիվ հարուցվել է քրեական գործ՝ սպանության և ապօրինի զենք պահելու հատկանիշներով: ՌԴ Քննչական կոմիտեն չի բացառել, որ սպանությունը եղել է պատվերով: Պաշտոնապես հայտարարվել է, որ կրակողը սպիտակ գույնի մեքենայում է եղել: Մեքենայի մակնիշը հայտնի է, բայց չի հաղորդվում՝ ելնելով նախաքննության գաղտնիությունից:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: