Ձեր վստահելի աղբյուրը

«Գնացի, նայեցի ճեղքից: Նախկին մսի բաժնի վրայի կամարները չկան ու այնպիսի տպավորություն էր, որ ոչ թե քանդվել է, այլ խնամքով քանդել են»,- Հանրային խորհրդի հրավիրած «Փակ շուկայի» թեմայով քննարկման ժամանակ իր ասաց ՀԽ նախագահ Վազգեն Մանուկյանը:

Ինչո՞ւ է քանդվել պետության կողմից պահպանվող հուշարձանի մի մասը, ո՞վ է մեղավոր, ո՞վ է պատասխանատու, ի՞նչ անել, հնարավո՞ր է վերականագնել հին տեսքը: Իր խոսքից հետո նման հարցադրումներ արեց Վազգեն Մանուկյանը, որոնց պատասխաններ տվեցին ոլորտի պատասխանատուները, մասնագետները:

ՀՀ մշակույթի նախարարի և Երևանի քաղաքապետի համատեղ հրամանով ստեղծված հանձնաժողովի նախագահ, Ճարտարապետների միության նախագահ Մկրտիչ Մինասյանն ասաց, որ ամեն ինչ սկսվել է նրանից, որ առք ու վաճառքի ժամանակ մշակութային հուշարձանի պահպանական պարտավորագիր առաջին գնորդի ու վաճառողի` մշակույթի նախարարության միջև չի ստորագրվել: Նույնը կրկնվել է նաև երկրորդ գնորդի դեպքում: «Իսկ պարտավորագրով հստակ ասվում է` ինչ կարելի է անել, ինչ չի կարելի անել, հուշարձանը իր ֆունկցիան չի կարող փոխել , որևէ միջամտություն չի կարելի անել առանց պաշտոնական եզրակացությունների»,- ասաց նա` հավելելով, որ առկա օրենքները բավարար են այդ խնդիրների լուծման համար, ուղղակի այս պարագայում օրենքը չի գործել:

Մշակույթի նախարարության Պատմության ու մշակույթի հուշարձանների պահպանության գործակալության Երևանի տարածքային բաժնի պետ Կարո Այվազյանը համաձայնեց, որ սեփականատերը օտարելու ժամանակ պարտավոր էր ստորագրել պահպանական պարտավորագիր, ինչը սակայն չի եղել ու սխալը հենց եկել է այդտեղից: Հանրային խորհրդի իրավաբան Արմեն Տեր-Տաճատյանի խոսքով, եթե առք ու վաճառքի պայմանագրի կնքնման ժամանակ նման պարտավորագիր չի ստորագրվել, այժմ էլ կարելի է դա անել: Միաժամանակ նրա խոսքով, կա օրենք, որը չի թույլատրում քանդել պետության կողմից պահպանվող հուշարձանը, այսինքն օրենքը խախտվել է, հետևաբար պետք է պատժվեն օրենքի խախտողները:

Պատմամշակութային արգելոց-թանգարանների և պատմական միջավայրի պահպանության ծառայություն ՊՈԱԿ-ի տնօրեն Վլադիմիր Պողոսյանն ասաց, որ Հայաստանում կա 25 հազար պետության կողմից պահպանվող հուշարձան, որից 19 հազարը պետության սեփականությունն են, օտարման ենթակա չեն, իսկ մնացած 6 հազարը պետությունը կարող է վաճառել, բայց անպայման ստորագրել պահպանական պարտավորագիր: Այդ 6000 հուշարձանից 5800-ը նման պարտավորագիր չունեն, հետևաբար, ըստ նրա, հնարավոր է կրկին հանդիպել նման խնդիրների: «Եթե հուշարձանը որպես սեփականության վաճառվում է, սեփականատերը մշակույթի նախարարության հետ պարտավոր է կնքել այդ պատավորագիրը»,- ասաց նա: ՀԽ ղեկավար Վազգեն Մանուկյանն էլ ասաց, որ պետք է անհապաղ նման հարց բարձրացվի, որ ստորգրվեն նման պարտավորագրեր:

Անդրադառնալով շուկայի ներկայիս վիճակին, Մկրտիչ Մինասյանը նախ ներկայացրեց, թե ինչպես է թույլատրվել սեփականատիրոջը զրոյական հարկում կառուցել ավտոկայանատեղի. «Երբ արդեն սկսվեց այդ հարցով քննարկումը, սեփականատերն արդեն անօրինական, առանց որևէ նախագծի, սկսել էր փորել, աշխատանքներ տանել: Ու ստիպված տրվեց համաձայնություն` կառուցել ավտոկայանատեղի` ամրացնելով շենքը, քանի որ այնքան անթույլատրելի բան էր արվել, որը շենքի կայունությունը կխախտեր: Նախքան որևէ աշխատանք տանելը, պետք է ամրացվեր շենքը, քանի որ 1952 թվականից առ այսօր կապիտալ վերանորոգման չէր ենթարկվել»: ՀՀ մշակույթի նախարարի և Երևանի քաղաքապետի համատեղ հրամանով ստեղծված հանձնաժողովի անդամ, «Հայ նախագծի» տնօրեն Գրիգոր Ազիզյանն ասաց, նույնիսկ շենքի մեջ բացված փորսորակի առկայությունը չէր վնասում շենքի կայունությանը: Նրա խոսքով, այժմ իրենց հանձնաժողովը պահանջում է, որ մեկ շաբաթվա ընթացքում սեփականատերը ներկայացնի էսքիզային նախագիծ, որին պետք է մասնագիտական խումբը տա եզրակացություն: Ըստ այդ նախագծի` պետք է ստեղծվի համապատասխան կոնստրուկտիվ համակարգ` մասամբ պահելով հինը, ստեղծել նորը, բայց շենքի արտաքին տեսքը որևէ փոփոխության չպետք է ենթարկվի: Նա վստահեցրեց, որ դա հնարավոր է 100 տոկոս: Իսկ ստորգետնյա ավտոկայանատեղին կարելի է կառուցել` առանց որևէ վնաս հասցնելով շենքին: Մկրտիչ Մինասյանն էլ հաստատեց, որ հնարավոր է վերականգնել հին տեսքը` ամրացնելով վտանգավոր մասերը, մնացած հատվածի վրա: «Այդ ամենը հնարավոր է անել, քանի որ մնացած կամարներն ունեն այդ ռեսուրսները»,- ընդգծեց նա:

Գ. Ազիզյանը նշեց, որ սեփականատիրոջ հետ կա բանավոր համաձայնություն, մնում է ներկայացվի նախագիծն ու խիստ վերահսկողության ներքո սկսել շինարարական աշխատանքները:

Վազգեն Մանուկյանը իր խոսքում նշեց, որ նորմալ պետությունում այս վիճակը դատարանում է լուծում գտնում: «Մեր երկրում դատական միջոցներով հարցեր չենք լուծում, լուծում ենք ընկերական, ախպերական ճանապարհով, դրա համար միշտ այդպիսի հարցեր են առաջ գալիս: Կառավարությանն էլ պետք է խորհուրդ տրվի, որ գնա դատական ճանապարհով»,- նշեց ՀԽ նախագահը: Միաժամանակը նա առաջարկեց, որ հանձնաժողովը հստակ կետերով ՀԽ-ին ներկայացնի իրենց պահանջները` հաշվի առնելով այսօրվա քննարկման ժամանակ հնչած հարցերն ու դիտարկումները, որը ՀԽ-ն կներկայացնի համապատասխան մարմինին: Նա նաև նշեց, որ ՀԽ-ն այս հարցով կդիմի և ՀՀ նախագահին, և կառավարությանը:

Քննարկմանը ներկա «Դալմա-Սոնա» հիմնադրամի տնօրենը լուռ հետևելուց հետո ի վերջո ասաց. «Բոլոր խնդիրները լուծում չեն ստանա, մինչև չլինի քրեական պատասխանատվություն, մինչև մեղավորը չպատժվի: Եթե դա չլինի, այս շարանը շարունակվելու է»,- ընդգծեց նա: Մեկ ուրիշն էլ արձագանքեց. «Մինչև ազգային շահը վեր չդասվի անհատական շահից, այս շարանը շարունակվելու է»: Մեկն էլ ասաց, որ որ ինքը վստահություն չունի, որ շուկան նման վիճակի հասցրած մարդը կարող է այն վերանորոգել այնպես, ինչպես որ պահանջվի ու առաջարկեց «Պետք է անվստահություն հայտնել սեփականատիրոջը»: Այս առաջարկի հետ շատերը համաձայնվեցին:

Նախորդող նորություններ`

Սամվել Ալեքսանյանը եկամուտ չի ակնկալում «Փակ» շուկայից (տեսանյութ)

Սեփականատերը հավաստիացրեց` Փակ շուկան վերջում նույն տեսքը կունենա

Փակ շուկա. մշակույթի նախարարությունը և Երևանի քաղաքապետարանը կքննարկեն իրավապահ մարմիններին դիմելու նպատակահարմարությունը

Փորձել է ամրացնել, բայց քանդե՞լ է. Քաղաքապետն արձագանքել է Փակ շուկայի խնդրին

Փորձել է ամրացնել, բայց քանդե՞լ է. Քաղաքապետն արձագանքել է Փակ շուկայի խնդրին

Հենց հիմա քանդում են փակ շուկան. ահազանգ Facebook-ում