Ձեր վստահելի աղբյուրը

Լոռու մարզի Սվերդլովի միջնակարգ դպրոցը երկու հարկանի հսկա շինություն է: Արդեն հեռվից, սակայն, երևում է, որ շենքի մի հատվածում պատուհաններ չկան: Ներս մտնելիս առաջին բանը, որ աչքի է ընկնում, բետոնե կիսաքանդ հատակն է:

Մի փոքր վերև նայելով արդեն, կարելի է տեսնել կաթող տանիքի հետևանքները` սևացած առաստաղ ու տեղ-տեղ քայքայված պատեր:

Շինությունը կառուցվել է 87 թվականին: Շինությունը տիպային է, համեմատաբար կայուն է: 7 բալի համար է նախատեսված եղել, 1988-ի երկրաշարժին, բարեբախտաբար դիմացել ու չի փլուզվել, բայց միջնապատերն են վնասվել: Մի մասնաշենքն առհասարակ չի օգտագործվում:

Տնօրեն Արմեն Ղուկասյանի խոսքով, շենքը հիմնանորոգման խիստ կարիք ունի, վերջին անգամ մասնակի վերոնորոգվել է 2000-ին:

«Տանիքը լավ վիճակում չէ, տեղ-տեղ կաթում է: Պարբերաբեր քանդվում է, բարձրանում ենք կարկատում: Պատուհանների մեծ մասը սովետական ժամանակաշրջանի են` տեղ-տեղ քամին փչում է, ջերմության կորսուստ ենք ունեննում: Դասասենյակների հատակը քանդվում է, միջանցքում առհասարակ բետոնե հատակ է: Դռները նույնպես փոխել է պետք, հին են, մաշված ու քայքայված»,- ասում է տնօրենը:

Արմեն Ղուկասյանը վերանորոգման համար բազմիցս է դիմել թե պատկան կառույցներին, թե բարերարներին: Որոշ աշխատանքներ կատարվել են, որոշների հույսեր ունեն, ծրագրում էլ ընդգրկված է դպրոցը:

«Բայց առաջիկա 3 տարում չի լինի, առաջնահերթություններ են սահմանված, մերը երկրորդում է: Առաջնային այս պահին պատուհաններն ու տանիքը փոխելու անհրաժեշտություն կա, ապա հատակի վերանորոգում և ներքին հարդարում»,- ասում է տնօրենը:

Թեև պայմանները լավը չեն, բայց դպրոց աշակերտները սիրով են հաճախում: Սվերդլովի միջնակարգ դպրոցն ունի 128 աշակերտ: Նաև նախակրթարան է գործում, որտեղ 11 երեխա սովորում են պետության միջոցներով, ևս 10` դպրոցի:

«Առաջադիմությունը բավարար է, լավ աշակերտներ ունենք»,- նշում է Արմեն Ղուկասյանը:

Սվերդլովի դպրոցի ուսուցիչների 90 տոկոսը մասնագետներ են` բարձրագույն կրթությամբ, միայն ֆրանսերենի ուսուցչի անհրաժեշտություն ունի դպրոցը, մրցույթ են հայտարարել վաղուց, բայց դեռ հայտեր չկան: Տարածաշրջանում ֆրանսերենի մասնագետ չկա: Թոշակառու ուսուցչուհին է պարապում, մինչև մասնագետ կգտնվի:

Արմեն Ղուկասյանի խոսքով, գյուղում աշխատատեղեր չկան, մեծ մասը արտասահման են գնում` աշխատելու, մյուսներն էլ անասնապահությամբ են զբաղվում: Սոցիալապես մարդիկ այնքան էլ ապահով չեն:

Գյուղական դպրոցների մասին շարքի նախորդ պատմությունները՝

Հիվանդանոցի համար նախատեսված շենքում, 15 աշակերտով և օդում կախված` Տալվորիկի դպրոցը

Արծվաբերդի դպրոցը` գյուղապետարանի նախկին, վթարային շենքում

5.5 դասարանով և աշակերտներին նվիրված ուսուցիչներով սահմանամերձ դպրոցը

7 աշակերտ` 3 ընտանիքից, 4 դասարանով և խարխուլ շենքով դպրոցը