Ձեր վստահելի աղբյուրը

Արծվաբերդի հիմնական դպրոցի շենքը երկրաշարժի ժամանակ վթարային է դարձել, ինչից հետո դպրոցը տեղակայվել է գյուղապետարանի նախկին շենքում:  30-ականների վերջում կառուցված շինությունը երբևէ չի վերանորոգվել:

Սևացած ու ճաքած պատերով, քանդված հատակով, կիսամաշ գույքով վթարային շինությունը հիմնանորոգման խիստ անհրաժեշտություն ունի: 

Դպրոցի տնօրեն Սիրանույշ Ուզունյանը բազմիցս դիմել է համապատասխան մարմիններին, տարբեր կազմակերպությունների: 

«Դեռ որևէ պատասխան ու արձագանք չկա: Փորձում ենք հարմարվել մեր պայմանների հետ»,- ասում է տնօրենը:

Դպրոցի շենքի տանիքը համեմատաբար բարվոք վիճակում է, տարիներ առաջ դպրոցների միջոցներով վերանորոգել են: Վատ վիճակում է հատակը, պատուհանների մի մասը ևս կարողացել են փոխել:

Դպրոցական գույքի որոշ մասը նորացվել է, տնօրենը շատ չի դժգոհում, բայց պակաս բաներ կան:

Դպրոցում սովորում է 112 աշակերտ: Գյուղից արտահոսքը մեծ չէ, աշակերտների թիվը չի տատանվում:

«Մոտ ապագայում դպրոցի հարևանությամբ զինվորական ավան են կառուցելու, ակնկալում ենք, որ աշակերտների թիվը կավելանա, քանի որ տարբեր տեղերից սպաներ կգան, որոնց երեխաներն այստեղ կսովորեն»,- ուրախությամբ նշում է Սիրանույշ Ուզունյանը:

Դպրոցն անհրաժեշտ մասնագետների պակաս չունի, դասաժամերը շատ չեն, իսկ առարկաները բոլորը մասնագետ-ուսուցիչներ ունեն:

«Մեր դպրոցը նվիրյալ մանկավարժներ ունի»,- հպարտանում է տնօրենը:

Առաջադիմությունը լավ է, աշակերտների 99 տոկոսը շարունակում է կրթությունը, նաև բուհերում ընդունված ուսանողներ ունեն:

Արծվաբերդ գյուղը պետական սահմանից հեռու է 8 կմ: Սոցիալական պայմաններն այնքան էլ լավ չէ. «Գոյատևում ենք, սահմանամերձ գյուղ է: Շատ լացել չենք սիրում, ապրում ենք ինչպես կարողանում ենք: Սովորական գյուղական պայմաններ են, մարդիկ ապրում են էլի»:

Գյուղի տղամարդկանց մեծ մասը ծառայում է, գրեթե բոլորը պաշտպանում են Հայաստանի սահմանն ու իրենց տունը, որտեղից սկսում է երկիրը:

Գյուղական դպրոցների մասին շարքի նախորդ պատմությունները՝

5.5 դասարանով և աշակերտներին նվիրված ուսուցիչներով սահմանամերձ դպրոցը

7 աշակերտ` 3 ընտանիքից, 4 դասարանով և խարխուլ շենքով դպրոցը