Ձեր վստահելի աղբյուրը

Գեղամաբակ գյուղում առավոտյան երեք ընտանիքում իրարարանցում է: Գյուղի միայն այս ընտանիքներում աշակերտ ունեն. երեխաները պատրաստվում են դասի գնալ: Երեք ընտանիքներից դպրոց է գնում յոթ երեխա: Յոթ երեխաներն էլ սովորում են դպրոցի չորս դասարանում:

Գյուղում աշակերտների փոքր թիվը պայմանավորված է նրանով, որ ամուսնություններ չեն եղել, հիմա նոր սերունդ է մեծանում. այս ընթացքում ամուսնացածների երեխաները շուտով արդեն դպրոցական տարիքի կլինեն: Գեղարքունիքի մարզի Գեղամաբակի հիմնական դպրոցն արդեն մի քանի տարի է՝ ամենաշատը ինը աշակերտ է ունեցել: Այս տարի դպրոցում շրջանավարտ չեն ունենալու:

Տնօրեն Աշխեն Բարսեղյանի խոսքով, բարձր դասարանը յոթերորդն է: Այս ուսումնական տարում երկու առաջին դասարանցի են ունեցել, այս և հաջորդ սեպտեմբերներին էլ կունենան:

Դասարանները կոմպլեկտավորված են՝ տարրական առաջինն ու երրորդը երկկոմպլեկտ են, հինգն ու յոթը՝ երկկոմպլեկտ: Երեք աշակերտ մի դասարանում է, չորսը՝ մի:

Դպրոցում 11 աշխատող ունեն: Բոլոր ուսուցիչները մասնագետ են, կան առարկաներ որոնց ուսուցիչները վերապատրաստված այլ առարկա էլ են պարապում, ինչպես օրինակ՝ կենսաբանություն և քիմիա:

Դպրոցն անգլերենի մասնագետ ուսուցչուհի չունի: Տնօրենի խոսքով, ընդամենը չորս ժամ է նախատեսված այդ առարկայի համար և որևէ ուսուցիչ այդ երկար ճանապարհը չի անցնի և հասնի գյուղ՝ չորս ժամ պարապելու համար:

Գեղամաբակի դպրոցի շենքը կառուցվել է 1948 թվականին: Այդ ժամանակից հետո երբևէ վերանորոգում չի եղել և խարխուլ վիճակում է:

«Ես արդեն չորս տարի է, որ այս դպրոցում տնօրեն եմ, ինչ կարողացել եմ, արել եմ: Ջերմ մթնոլորտ ենք ստեղծել: Կահավորել եմ, մի քիչ դասարանների տեսքը նորմալ է: Բայց ընդհանուր տանիքը լավ վիճակում չէ: Տեղ-տեղ կարկատան ենք արել, թիթեղ են փոխել որոշ հատվածներում, ծակերը փակել ենք, որ կաթոցներ չլինեն, բայց խարխուլ է: Հատակը՝ նմանապես: Պատուհանները հետևի կողմից ընդհանրապես չեն եղել, որքան կարողացել ենք տարբեր տեղերից ճարել, փակցրել ենք: Մի խոսքով, պատկերացրեք՝ 48 թվականին կառուցված ու երբևէ վերանորոգում չեղած շենքն ինչ վիճակում կլինի»,- ասում է տնօրեն Աշխեն Բարսեղյանը:

Դպրոցում ընդամենը 4 դասասենյակ ու մեկ համակարգչային կաբինետ կա: Դա էլ է բավարար յոթ աշակերտ ունեցող դպրոցում: Մի դասարանը տարրականի համար է, մեկը՝ միջինի, շախմատի, համակարգչի:

Վերանորոգման համար դպրոցի տնօրենը մի քանի անգամ դիմել է, բայց դպրոցը ոչ թե հիմնանորոգման, այլ նոր շենքի կարիք ունի:

Այս կառույցը ոչ տիպիկ է ու արդեն այնքան խարխուլ, որ վերանորոգումն անիմաստ կլինի:

«Հիմք չունի, մեծ խնդիրներ կան դրա հետ կապված, ոչ-ոք չի համարձակվի վերանորոգել: Հուսով ենք, որ լավ կլինի, մենք լավատես ենք»,- ասում է տնօրենը:

Գյուղական դպրոցների մասին շարքի նախորդ պատմությունները՝

Երկու մասնաշենք և 338 աշակերտ ունեցող դպրոցի փոքր հատվածն է միայն օգտագործվում

Ավազանի դպրոցը նույնիսկ 4 բալանոց երկրաշարժից փուլ կգա

Չորաթանի դպրոցն ու աշակերտների կիսատ մնացած ցանկությունը

Վերին Կարմիր Աղբյուրի դպրոցը` կիսավարտ, վթարային շենքում

Դաստակերտի դպրոցի տանիքը` անձրևաջրերով լցված, դպրոցը` քանդման եզրին 

Քամին տանիքն է տարել, անձրևները լցվել են շենք, քայքայել պատերն ու հատակը. Սպանդարանի դպրոցը

Փլատակ դարձած դպրոցը. 10 տարի փայտե տնակներում, հետո` խոնավ ու բորբոսնած պատերով շենքում

Հիմքերն անձրևաջրերով են լցվում, տանիքը` կաթում, հատակը քանդված է… Վերիշենի դպրոցը

Թասիկի դպրոցը` առանց դպրոցական շենքի, 14 աշակերտով

Քայքայված ու մաշված. Արտաբույնքի դպրոցի մեծ դասասենյակները տաքացնել չի լինում, ջեռուցումը դուրս է ցնդում

Քանդված տանիքով դպրոցը. Տնօրենը հնամաշ պատուհաններին մի կերպ ապակի է գցում ու ցելոֆաններ փակցնում

Քանդված հատակ, փտած դռներ, առաստաղից երևացող գերաններ և մութ դասասենյակներ. Կուտականի դպրոցը

Դպրոցը՝ նախկին կոլխոզի շենքում. Սալվարդում ընդամենը 15 աշակերտ կա

«Կոմպլեկտավորած դասարանում ուսման որակի հերն անիծվում է». Դպրոցի տնօրենը զենքերը վայր չի դնում

Պատուհանից այն կողմ` ցելոֆաններ երկնքի փոխարեն. Սորիկի աշակերտների երազանքն ու իրականությունը

Դպրոցը՝ վթարային շենքում. Դաշտադեմում մի քանի օրից ընդամենը ինը աշակերտ կմնա

Քայքայված պատեր ու ծակ լուսամուտներ. Վաղատինի դպրոցը

Յոթ աշակերտով դպրոցը, Աճարկուտում քիմիայի լաբորանտն արդեն 15 տարի հայոց լեզու է դասավանդում