Ձեր վստահելի աղբյուրը

ՕԵԿ խմբակցության ղեկավար Հեղինե Բիշարյանը խմբակցության անունից 20 րոպե ընդմիջում վերցրեց, որպեսզի բոլոր խմբակցությունները ևս մեկ անգամ քննարկեն «Անձնական տվյալների պաշտպանության մասին» օրենքի նախագիծը: Այն, ըստ պատգամավորի, ունի բազմաթիվ հոդվածներ, որոնք խնդրահարույց են և այդ իսկ պատճառով նախագծին անհրաժեշտ է հստակ դեմ արտահայտվել:

«Ուզում եմ, որ բոլոր խմբակցությունները ևս մեկ անգամ քննարկում կազմակերպեն այս նախագծին դեմ լինելու հաստատմանը, որովհետև բազմաթիվ հոդվածներ, օրինակ` ֆիզիկական անձանց կողմից մարդու մասին տվյալներ հավաքելը կամ օտար երկրներին մարդու տվյալները տրամադրելը և այլն խնդրահարույց են»,- հայտարարեց նա` հորդորելով այդ 20 րոպեների ընթացքում խմբակցությունների ևս մեկ անգամ հետևություններ անել:

Նշենք, որ նախագծի քննարկումը մեկնարկել է նախօրեին, պատգամավորների մեծամասնությունը քննադատորեն մոտեցան դրան, քանի որ շատերի համար անհասկանալի է, թե ինչ խնդիր է լուծելու նախագիծը: Մասնավորապես, ՀՅԴ-ական Արծվիկ Մինասյանը հայտարարել էր, որ այս օրենքը աղավաղում է ՀՀ Սահմանադրությունով ֆիքսված մարդկանց իրավունքների պաշտպանությունը, մինչդեռ պետք է միտված լիներ դրանց ապահովմանը:

Նշենք նաև, որ նախագիծը կարգավորում է պետական կառավարման կամ ՏԻՄ-երի, պետական կամ համայնքային հիմնարկների կամ կազմակերպությունների, իրավաբանական կամ ֆիզիկական անձանց կողմից անձնական տվյալները մշակելու, դրանց նկատմամբ պետական հսկողություն իրականացնելու կարգն ու պայմանները:

Պետական և ծառայողական, բանկային, նոտարական, փաստաբանական ապահովագրական գաղտնիք համարվող, ազգային անվտանգությանը կամ պաշտպանությանը առնչվող գործողությունների ժամանակ օգտագործվող, ինչպես նաև փողերի լվացման և ահաբեկչության դեմ պայքարի, օպերատիվ-հետախուզական գործունեության ընթացքում և դատավարություններում օգտագործվող անձնական տվյալների հետ կապված առանձնահատկությունները կարգավորվում են այլ օրենքներով:

Թեմային առնչվող`
Ի՞նչ խնդիր է լուծելու «Անձնական տվյալների պաշտպանության մասին» օրենքը