Ձեր վստահելի աղբյուրը

Ադրբեջանն իր պատմությունը գրելիս պետք է դիմի Իրանի պատմությանը:
Այդ մասին իրանական «արաննյուզ.իռ» կայքի հաղորդմամբ՝ հայտարարել է Իրանի Արդաբիլ նահանգում ԻԻՀ հոգևոր առաջնորդ Ալի Խամենեիի ներկայացուցիչ (իմամ ջոմե) Սեյյեդ Հասան Ամելին:

Իրանցի բարձրաստիճան հոգևորականը, անդրադառնալով ներկայիս Ադրբեջանի Հանրապետության՝ իր պատմությունը գրելու մտադրությանը, մասնավորապես նշել է. «Պատմության ընթացքում Ադրբեջանն Իրանից անջատված չի եղել: Եթե Ադրբեջանը ցանկանում է իր համար պատմություն գրել, ապա պետք է դիմի Իրանի պատմությանը, քանի որ ազարիները նախկինում երբեք Իրանից առանձնացված չեն եղել»:

Հիշեցնենք, որ «արաննյուզ»-ի հաղորդմամբ՝ վերջերս Ադրբեջանի Գիտությունների ազգային ակադեմիայի պատմության ինստիտուտի տնօրեն Յաղուբ Մամեդովը հայտարարել է, թե Ադրբեջանը թյուրքերի համար ընդհանուր պատմություն գրելու գործում համագործակցում է Թուրքիայի հետ:

Իրանական աղբյուրը, մեկնաբանելով ադրբեջանցի պատմաբանի վերոնշյալ հայտարարությունը, մասնավորապես նշել էր. «Լսելով այդ տեղեկությունը՝ պարզ է դառնում, թե պանազարիզմի աջակցման կենտրոն Ադրբեջանն ու պանթյուրքիզմի ուղորդման կենտրոն հանդիսացող Թուրքիան ինչպես պետք է համատեղ ջանքերով խեղաթյուրեն պատմությունը: Ինչ վերաբերում է Ադրբեջանին, ապա այդ պետությունը կոմունիստական շրջանից սկսած, ինչպես նաև անկախության տարիներից ի վեր խեղաթյուրել է պատմությունը»:

Նկատենք, որ իրանցի պատմաբանները և վերլուծաբանները իրենց հոդվածներում ներկայիս Ադրբեջանի Հանրապետության մասին խոսելիս հաճախ այն անվանում են Արան և, անդրադառնալով Ադրբեջան պետության ստեղծման թեմային, մասնավորապես նշում են. «Ներկայիս Ադրբեջանի Հանրապետության տարածքն իրականում այլ պատմական անուն է ունեցել: Թուրքմենչայի և Գյուլիստանի պայմանագրերի համաձայն` Արաքսից հյուսիս ընկած շիաբնակ տարածքներն Իրանից անջատվում և անցնում են Ռուսական կայսրության տիրապետության տակ: 1911թ. Բաքվում հիմնվում է Մուսավաթական կուսակցությունը, որի հիմնադիրներ Ռասուլ Զադեն, Քազեմ Զադեն և Շարիֆ Զադեն, պանթուրքիստական գաղափարներից ելնելով, հովանավորվում էին Օսմանյան Թուրքիայի կողմից, իսկ արդեն 1918թ.-ին առաջին անգամ Արան և Շիրվան տարածքներում հռչակվում է մի պետություն, որը կրում է «Ադրբեջանի Հանրապետություն» շինծու անունը:

Նախորդող տեղեկատվություն՝ Իրանցի պատգամավոր. Պատմության մեջ «Ադրբեջան» անունով պետություն չի եղել, այն կեղծիքի միջոցով է ստեղծվել

Իրանական կայք. Պատմությունը խեղաթյուրելն Ադրբեջանի քաղաքականության առաջնահերթություններից է