Ձեր վստահելի աղբյուրը

Թեև նախորդ տարվա կեսերից արդեն հաստատվել է Երևանյան կրկեսի նոր շենքի նախագիծը, մակետը ներկայացվել է հանրությանը, սակայն շատ երևանցիներ դեռևս թերահավատ են` մտածելով, որ, այնուամենայնիվ, կրկեսի շենքի փոխարեն կամ բացի կրկեսի շենքից այդ տարածքում այլ շինություններ են նախատեսված: Հասկանալի է նրանց մտավախությունները, քանի որ աչքը տեսածից է վախենում:

Panorama.am-ի հետ զրույցում «Երևանյան կրկես» մշակութային կենտրոնի գեղարվեստական ղեկավար Սոս Իոսիֆ Պետրոսյանը վստահորեն հայտարարեց, որ ներկայացված նախագծից ոչ մի շեղում չի լինելու:

«Ինչպես ներկայացվել է նախագիծն, այդպես էլ լինելու է կրկեսի նորակառույց շենքը: Շինարարությունն ընթանում է շատ լավ տեմպերով: Նույնիսկ ձմռան այն ցուրտ օրերին չի դադարեցվել: Ճարտարապետը, շինարարներն ասում են, որ միջև հաջորդ տարվա առաջին եռամսյակ կրկեսի շենքը պատրաստ կլինի»:

Պատասխանելով հարցին, թե նախապես հայտարարված էր որպես վերջնաժամկետ 2014-ի ավարտը, ինչո՞ւ են ձգձգվում աշխատանքները, նա ասաց, որ «շենքի տակն ամբողջությամբ ջուր է եղել, ոնց որ գետ լիներ, հատուկ մասնագետներ են հրավիրվել, այսօր այդ ջուրը հատուկ տեխնիկայի միջոցով հեռացվում է»:

Ս. Պետրոսյանը նշեց, որ կրկեսի վերաբացումը նշանավորվելու է հատուկ կազմակերպված ճոխ ծրագրով. բացի հայ դերասաններից, լինելու են նաև օտարազգի անվանի դերասաններ:

Հիշեցնենք, որ դեռևս 2011 թվականի ապրիլին Երևանի քաղաքապետարանը հայտարարել էր, որ «Տաշիր Գրուպ»-ի հետ կնքած պայմանագրով վերջինս պետք է վերանորոգի Երևանի կրկեսը: Երևանի կրկեսի շենքը որոշվեց քանդել, երբ փորձագետները հանգեցին եզրակացության, որ աննպատակահարմար է վերակառուցել եղած հին շինությունը։ 2011թ. օգոստոսի 1-ից սկսվել են Երևանի պետական կրկեսի հիմնանորոգման աշխատանքները: Կրկեսի շենքը 1962թ. հիմնադրման օրվանից հետո չի վերանորոգվել:Նոր շենքի նախագծի հեղինակն է ճարտարապետ Վահագն Վերմիշյանը: Կրկեսի նոր շենքը կրկնելու է հնի արտաքին տեսքի ճարտարապետական որոշ տարրեր: Իսկ շենքը լիովին համապատասխանելու է նման կառույցների համար սահմանված միջազգային բոլոր չափանիշներին, նախկինում եղած 1560-ի փոխարեն ունենալու է 2000 հանդիսատեսի համար նախատեսված նստատեղ, բացի այդ 3 փոխարկվող մանեժ։ Բուն շենքը մոտ 6 մետր ավելի բարձր է լինելու և հագեցած է լինելու ժամանակակից բեմական տեխնիկայով։ Ինտերնետում Վ. Վերմիշյանի նախագծերի հիշատակումից գտանք միայն Ստեփանակերտի Սարգիս ու Ամալյա Կարապետյանների անվան նոր Հանրապետական բժշկական կենտրոնը:

Ինչ վերաբերում է Երևանյան կրկեսի թատերախումբի գործունեությանը, Ս. Պետրոսյանն ասաց, որ ինչպես նախորդ տարի, այս տարի էլ համերգային շրջագայություն են ունենալու ՀՀ մարզեր, ԼՂՀ, զորամասեր. «Մենք նախորդ տարի եղանք բոլոր մարզերում: Այս տարի նույնպես նախատեսել ենք այցելություններ մարզեր, քանի որ բնակչության կողմից մեծ ոգևորություն ենք նկատում: Այցելելու ենք նաև այն զորամասեր, որտեղ նախորդ տարի չենք հասցնել լինել»:

Նա նաև տեղեկացրեց, որ փետրվարի 1-ից սկսվելու է Լեոնիդ Ենգիբարյանի անվան Երևանի կրկեսային ստուդիայի ընդունելությունը:

Նախորդող հրապարակումներ`

2015 թ-ին կունենանք միջազգային չափորոշիչներին համապատասխան կրկես. Արման Սահակյան

Հաստատվել է Երևանյան կրկեսի նոր շենքի վերջնական նախագիծը

Դեռ պարզ չէ, թե երբ կսկսվի Երևանի կրկեսի նոր շենքի շինարարությունը

Գլխավոր ճարտարապետը վստահեցնում է` Երևանի վերակառուցվող կրկեսը իր նախկին տեսքն է ունենալու

Կրկեսի հին շենքը նորից պայթեցնելու են

 Կրկեսի շենքն այսօր կպայթեցնեն

Աշունը «Խուլախուպի» ոճով. Երևանի կրկեսը ելույթ է ունենալու Տավուշի և Գեղարքունիքի մարզերում

Երևանյան կրկեսը Սյունիքի մարզում է

Երևանյան կրկեսի թատերախումբը համերգային շրջագայության կմեկնի ԼՂՀ