Ձեր վստահելի աղբյուրը

Աֆրիկյանների շենքի քանդման փաստով Գլխավոր դատախազություն «Թրանսփարենսի Ինթերնեշնլ» հակակոռուպցիոն կենտրոնի ներկայացրած հանցագործության մասին հաղորդմանը դեռ գրավոր պատասխան չի եկել: ԹԻՀԿ իրավախորհրդատու Հերիքնազ Տիգրանյանը Panorama.am-ի թղթակից հետ զրույցում ասաց, որ իրենք ընթացքին հետևել են միայն հեռախոսազանգերի միջոցով, սակայն պաշտոնական ոչինչ չեն ստացել դեռ:

Իրավախորհրդատուն նկատեց, որ Գլխավոր դատախազություն ԹԻՀԿ-ը դիմել էր հունիսի 16-ին, իսկ հեռախոսազանգերի միջոցով տեղեկացել են, որ հանցագործության մասին հաղորդումը Գլխավոր դատախազությունն ուղարկել է Երևանի դատախազություն, վերջինս՝ Կենտրոն վարչական շրջանի դատախազություն՝ նյութեր նախապատրաստելու համար:

«Ըստ հեռախոսազանգի, իրենք ուղարկել են Կենտրոնի դատախազություն, որպեսզի այնտեղից էլ ուղարկեն Կենտրոնի քննչական բաժին: Բայց քրգործի հարուցման մասին տեղեկություն դեռ չունենք: Օրենքն ասում է, որ նյութեր պիտի պատրաստեն 10 օրվա ընթացքում և որոշեն քրգործ հարուցում են, թե մերժում, բայց այդ ժամկետն անցել է, մենք պրոցեսից ամեն օր ենք ուշանում: Շենքի վիճակն էլ բավական ոչ բարվոք է, հետ ենք մնում»,- ասաց Հերիքնազ Տիգրանյանը:

Առաջիկա օրերին ակնկալվում է, որ կստացվի նաև Գլխավոր դատախազության պաշտոնական գրություն-պատասխանը:
Հերիքնազ Տիգրանյանի խոսքով, Դատախազություն դիմելը` շենքի քանդման հարցով Վարչական դատարան ներկայացված հայցին այլընտրանքային քայլ էր:

«Մենք ուղղակի Գլխավոր դատախազության ուշադրությունը հրավիրում ենք, որ իրենց լիազորությունների սահմաններում քայլեր ձեռնարկեն իրավախատումը կանխելու համար: Մշակութային հուշարձանի քանդումը հանցագործություն է, տեղի է ունենում հանցագործություն, իսկ իրավապահ մարմինը ոչ միայն պիտի բացահայտի ու պատժի, այլ նախ կանխի այդ հանցագործությունը: Մենք նաև որոշակի կանխարգելիչ միջոց էինք համարում»,- մանրամասնեց նա:

Նշենք, որ շենքի` առանց Մշակույթի նախարարություն անհրաժեշտ փաստաթղթերի ներկայացնելու և սահմանված ընթացակարգի մեկնարկած ապամոնտաժման և ոստիկանության աշխատակիցների դրսևորած անգործության մասին ահազանգել ու հանցագործության մասին հաղորդում էր ուղարկել իրավապահ մարմիններին նաև Panorama.am-ը: Ոստիկանությունից մեր գրավոր հարցմանը պատասխանել են, որ «տեղեկությունը տրամադրելու համար անհրաժեշտ է կատարել լրացուցիչ աշխատանք, և «Տեղեկատվության ազատության մասին» ՀՀ օրենքի 9-րդ հոդվածի համաձայն` այն կտրամադրվի 30-օրյա ժամկետում»: Գլխավոր դատախազությունից որևէ պատասխան դեռ չի ստացվել:

Հավելենք, որ Աֆրիկյանների ակումբի շենքի տեղափոխման հարցով Վարչական դատարան ևս հայց է ներկայացված: Սա արդեն երկրորդ հայցն է, որով վիճարկվում է շենքի տարածքը կառուցապատողին հանձնելու մասին քաղաքապետարանի համապատասխան որոշումը: Դատարանը հայցը վարույթ ընդունելու կամ մերժելու համար ժամանակ ունի մինչև հունիսի 8-ը: Մինչ այս հարցը, դատարանում շենքի ճակատագրով մտահոգ քաղաքացիները փորձել էին վիճարկել նաև շենքը տեղափոխելու մասին կառավարության որոշումը, սակայն դատարանը վարույթ չէր ընդունել հարցը:

Նախորդող հրապարակումներ`

Աֆրիկյանների շենքի հետ կապված նորից հայց է ներկայացվել դատարան

Վարչական դատարանը մերժել է վարույթ ընդունել Աֆրիկյանների ակումբի վերաբերյալ հայցը

Դատարանը դեռ վարույթ չի ընդունել Աֆրիկյանների շենքի գործով հայցը

Աֆրիկյանների շենքի ֆասադի զգալի մասն արդեն չկա (Տեսանյութ)

Նախարարությունը փորձում է պարզաբանել Աֆրիկյանների շենքի «քանդումն ու տեղափոխումը»