Ձեր վստահելի աղբյուրը

Հաստատված տարածք, հաստատված նախագիծ, սակայն այդպես էլ Համազգային թատրոնի կառուցման աշխատանքները չեն սկսվում: Պատճառը՝գումարն է: Panorama.am-ի հետ զրույցում թատրոնի տնօրեն Վարդան Մկրտչյանն ասաց. «Համազգային թատրոնը ոչինչ չի սկսում: Ֆինանսավորում չունենք: Սպասման մեջ ենք: Միակ խնդիրը գումարն է»:

Նրա խոսքով, թեև հայտարավել էր դրամահավաք, սակայն հավաքված գումարը դեռ շատ քիչ է ծրագրի իրականացման համար. «Որևէ կերպ չենք մոտենում ցանկալի արդյունքի: Արդյունք կլինի այն ժամանակ, երբ լինի պետական խոշոր աջակցություն: Պատկան մարմինները որևէ կոնկրետ առաջարկություն, կոնկրետ ժամկետ չեն նշել, թե երբ կարող են գումար հատկացնել թատրոնի կառուցման համար: Փորձում ենք հնարավորության դեպքում կառուցման համար նախատեսված ծախսերը մտցնել 2016 թվականի պետական բյուջեի մեջ»:

Վ. Մկրտչյանի խոսքով, բոլորն էլ խնդրին ծանոթ են, սակայն այս պահին իրենց կողմից որևէ նախաձեռնություն չկա:

Հիշեցնենք, որ մշակույթի նախարար Հ. Պողոսյանն ավելի վաղ Մնջախաղի և Համազգային թատրոնների շենքերի կառուցման հետ կապված ասել էր. «Հույս միշտ էլ կա, այդ հարցը մշտապես ուշադրության կենտրոնում է, սակայն կա առաջնահերթությունների խնդիր»: 

Թատրոնի կառուցման համար տարածք է հատկացվել Երևանի Գլխավոր պողոտայի Սարյան փողոցին հարող հատվածում: Շենքի նախագծի հեղինակն է ճարտարապետ Լևոն Ղալումյանը:

Նշենք, որ այժմ Գլխավոր պողոտայի՝ Սարյան փողոց-Մաշտոցի պողոտա միջանկյալ հատվածի այգում («Մալիբու» սրճարանին հարակից հանգստի գոտի) բարեկարգման աշխատանքներ են ընթանում: Վ. Մկրտչյանն ասաց, որ բարեկարգումն իրենց հետ որևէ կապ չունի. «Բարեկարգողների հետ ինչքան խոսել եմ, նշում են, որ իրենց միայն ասված է եղել այն հատվածը, որտեղ նախատեսված է կառուցել շենքը մաքրեն ու դուրս գան: Այդտեղ շինարարություն չեն սկսելու»:

Նախորդող հրապարակումներ՝
Համազգային պետական թատրոնի կառուցման համար հայտարարվում է համազգային դրամահավաք
Համազգային թատրոնի կառուցումը ձգձգվում է ֆինանսական խնդիրների պատճառով
Համազգային թատրոնի համար կառուցվելիք շենքը իրենից ներկայացնելու է կանաչապատ հարթություններ. «Մենք այստեղ շենք չենք դնում»
«Համազգային» թատրոնի շենքը կառուցվելու է ճարտարապետ Լևոն Ղալումյանի արվեստանոցի ներկայացրած էսքիզով
«Համազգային» թատրոնի շենքի էսքիզային նախագծի մրցույթն ավարտվել է. հաղթած երեք նախագծերից դեռ պետք է ընտրեն
«Համազգային» թատրոնի շենքի նախագծի մրցույթ է հայտարարված
«Համազգային» թատրոնն այլևս չի ուզում «թափառել». «Վաստակել ենք սեփական շենք ունենալու իրավունքը» (լուսանկարներ)