Ձեր վստահելի աղբյուրը

Իրավապաշտպան Լալա Ասլիկյանն ասում է, որ հասարակական ոլորտում հաջողություններ արձանագրելը շատ դժվար է, հետևաբար չի կարող հստակ ասել, թե 2012-ին «Բանակն իրականում» նախաձեռնությունն ինչ հաջողությունների է հասել:

Հիշեցնենք` այս նախաձեռնության օժանդակությամբ Հայաստանի զինված ուժերում այս կամ այն պատճառով որդի կորցրած մայրերը սև հագուստներով ամեն շաբաթ կանգնում էին կառավարության առջև ու պահանջում արդարություն:

«Ի՞նչը կարող է լինել բանակում որդի կորցրած սևազգեստ մայրերի համար հաջողության ցուցանիշը, եթե նրանց որդիների սպանությունները բացահայտված չեն: Օրինակ, Տիգրան Օհանջանյանի գործում փոփոխություն է եղել և համաձայնում են, որ այքդան հոսանքը չի կարող մարդ սպանել: Շատ չնչին բան է դա, բայց եղել է: Միևնույնն է` նույն ձև շարունակում են պարտակել գործերը», -Panorama.am-ի թղթակցի հետ զրույցում ներկայացնում է Լալա Ասլիկյանը:

Նախաձեռնության տարբեր ակցիաները բանակում զոհված զինծառայողների բազմաթիվ գործերով կարողացել են հնչեղություն ապահովել, բայց հաջողություն չեն արձանագրել: Ավելին, այդ ամենը կարողացել են անել սևազգեստ մայրերի առողջության, քանի որ, իրավապաշտպանի խոսքով, ամենօրյա պայքարը քայքայում է մարդուն, «դարձնում է գիժ», չէ՞ որ ծնողները վիշտը սրտում այս կամ այն պաշտոնյայի դուռն են թակում:

««Մատաղիսի գործ»-ով արդարացման վճիռը տղաների համար հաջողություն էր, իսկ հաղթանակը կլինի այն ժամանակ, երբ մարդասպանը պատիժը կրի», -ասում է Լալա Ասլիկյանը:

Իրավապաշտպանը խոստանում է նույն պայքարի ոգին պահել նաև 2013-ի համար: «Մենք կվերլուծենք մեր բոլոր բացթողումները, որովհետև այո, մենք ինքներս էլ բացեր ունեցել ենք, դրանք կվերլուծենք ու կշարժվենք առաջ», -ասում է Ասլիկյանը:

Հարակից հրապարակում. Արդարության հաստատման էպիզոդիկ դեպքերը. Տարին ամփոփում է իրավապաշտպանը