Սյունիքի արոտավայրերը` Իրանին. Ինչքա՞ն տարածքի, ի՞նչ գնի ու ժամկետի մասին է խոսքը
Համաձայն ՀՀ Սյունիքի մարզի և ԻԻՀ Արևելյան Ատրպատականի միջև համագործակցության մասին հուշագրի նախագծի՝ սկզբնական շրջանում իրանական կողմը 5 տարի ժամկետով կվարձակալի Սյունիքի մարզի հողերը: Այդ համաձայնագիրը նախատեսում է 100 հազար գլուխ անասուն տեղափոխել Սյունիքի արոտավայրեր: Սակայն սկզբնական շրջանում Սյունիքի արոտավայրերից 50 հազար հեկտար կվարձակալվի և շուրջ 50 հազար գլուխ անասուն կտեղափոխվի: Այս մասին գրել է իրանական «ԻԱՆԱ» (Iranian Agriculture News Agency) լրատվական գործակալությունը:
Հայկական հողերը հարևանին անասնապահության նպատակով տրամադրելու մասին խոսակցությունները միանշանակ չեն ընդունվում հայ հասարակության կողմից: Նմանատիպ համագործակցությանն ընդդիմացողները նշում են, որ անասնապահության հետևանքով այդ հողերը կկորցնեն իրենց արդյունավետությունը, կամ ինչու պետք է մեր հողերը տանք իրանցիներին, եթե այդտեղ կարող են արածել սյունեցիների անասուները: Ոմանք էլ կասկածամտորեն նկատում են, թե Իրանը աչք է դրել մեր հողատարածքների վրա:
Սյունիքի մարզապետարանի գյուղատնտեսության և բնապահպանության վարչության պետ Սամվել Թանգյանը Panorama.am-ին հայտնեց, որ այս պահին իրանական կողմի հետ որևէ հողատարածքի վարձակալության վերաբերյալ համաձայնագիր կնքված չէ: Վարչության պետը հրաժարվեց հայտնել, թե ում կողմից է եղել այդ համագործակցության առաջարկը, այն փոխշահավետ է համարում:
«Առայժմ ոչ պայմանագիր կա, ոչ էլ փաստաթղթի նախագիծ: Իրենց հետաքրքրում են արոտներ, մենք էլ ունենք արոտավայրեր: Եթե համայնքը շահ չունենա, հենց ընենց կարո՞ղ ա իր հողերը տա»,-ասաց Թանգյանն ու խոստովանեց, որ ընտրություններից հետո իրանական կողմի մասնագետները ժամանելու են Սյունիք` ուսումնասիրություններ անելու նպատակով: Թանգյանը պնդում է, որ այս պահին հայտնի էլ չէ, թե խոսքը ինչքան հողատարածքի, վարձակալության ինչ գնի ու ժամկետւ մասին է:
«Մինչև պայմանագիր չլինի, չենք կարող տարածքի ու գումարի մասին որևէ բան ասել»,-ասաց վարչության պետն ու հստակեցրեց, որ ըստ կարգի, համայնքի ավագանու որոշմամբ են հողերը տրվում վարձակալության: Վարձակալության ժամկետը, գումարը որոշողը կրկին ավագանին է:
«Այսօր 50-60 համայնք հնարավորություն ունեն արոտներ տալու: Որոշողը համայնքի ավագանին է, նույնիսկ համայնքապետը ինքնագլուխ որոշում կայացնելու իրավունք չունի: Եթե համայնքը չի ցանկանում տրամադրել, ապա ոչ ոք նրան պարտադրել չի կարող»,-ասաց մարզպետարանի ներկայացուցիչը, չբացառելով, որ կարող են լինել համայնքներ, որոնք հրաժարվեն իրենց տրամադրության տակ եղած արոտավայրը տրամադրել որևէ մեկին: Վարձակալության տալու դեպքում էլ գումարն գնալու է համայնքային բյուջե:
Վարչության պետն ասում է, որ վարձակալության համար նախատեսված հողերը արոտավայարեր են, որոնք շուրջ երկու տասնամյակ չեն օգտագործվում համայնքների կողմից: Դրանց մի մասը գտնվում են «սահմանամերձ տարածքում` ադրբեջանական պոստերի հարևանությամբ, մի մասն անջրդի են»:
«Խոսքը վերաբերում է մեր կողմից բացարձակապես չօգտագործվող տարածքներին: Դրանք շատ են, մոտ 30-40 հազար հա: Սովետի փլուզումից հետո չեն օգտագործվել, պատճառները շատ են»,-պարզաբանեց Ս. Թանգյանը:
Արոտավայրերն ամենայն հավանականությամբ վարձակալության կտրամադրվեն 3-5 տարի ժամկետով: «Նրանք այդ տարածքներում պետք է աշխատանքներ իրականացնեն` արոտավայրերի բարելավում, ջրարդիացում, թե չէ արոտներ ունենք, որ ջուր չկա: Էդ մարդիկ ծախս են անելու: Փորձելու ենք, ինչքան հնարավոր է` կարճ ժամանակով տրամադրենք: Երբ որ մեր անասնագլխաքանակը շատանա, երբ տեսնենք, որ այդ արոտները մեզ պետք են, կարողնանք պայմանագրերը չեղյալ համարել»,-ասաց մարզպետարանի ներկայացուցիչը:
Նշենք, որ հունվարի կեսերին Սյունիքի մարզպետն այցելել է Իրանի Արևելյան Արտպատական նահանգ:
Նախորդող հրապարակումներ`Իրանը Հայաստանին պետրոքիմիական անհրաժեշտ արտադրանքով կապահովի
Իրանի Արևելյան Ազարբայջանի նահանգապետ. Մենք շահագրգռված ենք Հայաստանում ներդրումներ կատարել
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
