Ձեր վստահելի աղբյուրը

«Եկել է մի փուլ, որ հասարակությունը հուշարձանի ազատագրումը պետք է իր ձեռքը վերցնի»,- «Ծածկած շուկայի» հարևանությամբ հրավիրված բացօթյա ասուլիսում հայտարարեց «Ազատագրենք հուշարձանն օլիգարխից» հասարակական շարժման անդամ համակարգային վերլուծաբան Գարեգին Չուգասզյանը:

Հիշեցնենք, որ շարժումը օրերս հանդես է եկել հայտարարությամբ «Ծածկած շուկայի» վերաբերյալ՝ պահանջելով «Ծածկած շուկայի» սեփականատիրոջն օրենքով սահմանված կարգով ենթարկել պատասխանատվության:
Գ. Չուգազյանի խոսքով, Երևանի կենտրոնում կատարվել է բարբարոսություն. հուշարձանի սեփականատերը գիտակցաբար շարունակել է ավերել պատմամշակութային արժեքը. «Այն այսօր խաթարված է ոչ միայն արտաքինից, այլ նաև ներսից»:

Իտալիայում բնակվող հայ քանդակագործ Ավետիս Վիգենը լրագրողներին ասաց, որ հուշարձանն իր կառուցվածքով սրբագույն կառույց է. «Բացահայտեմ, որ այս շինությունը Փակ շուկա չի կառուցված, ծածկագրված է, հին հայկական քրիստոնեական տաճար է՝ կառուցված հեթանոսական սկզբունքով: Քանի որ խորհրդային շրջան էր, չէին կարող անվանել Անահիտի տաճար, սուրբ Պետրոսի տաճար, անվանվեց Փակ շուկա: Սա սրբավայր է՝ հավաստիացնում եմ ձեզ»:

Նախաձեռնության անդամներն այն կարծիքին են, որ հուշարձանի նախնական տեսքը կարելի է վերականգնել: «Մենք այն ժողովուրդն ենք, որ Գառնիի տաճարն ենք վերականգնել: Սա էլ է հնարավոր նախնական տեսքի բերել»,- համոզված ասաց Գ. Չուգազյանը: Ճարտարապետ Սաշուր Քալաշյանն էլ ընդգծեց, որ «բետոն է, արմատուրա», կարելի է վերականգնել: Ըստ նրա, հուշարձանն հասել է այսօրվա վիճակին առաջին հերթին Երևանի քաղաքապետարանի մեղքով: Ճարտարապետի խոսքով, այսքան ժամանակ միայն մշակույթի նախարարությունն է, որ հետևողականորեն հավատարիմ է մնացել իր պետական կոչմանը. նիստեր է գումարել, քննարկել է խնդիրը, ցուցմունքներ է տվել պատվիրատուին, սակայն սեփականատերը չի ենթարկվել ու արել է այն, ինչ ինքն է ցանկացել:

Գ. Չուգազյանն ասաց, որ այսօրվանից սկսվում է իրենց պայքարը՝ կիրառելով օրենքով չարգելված բոլոր միջոցները, նաև քաղաքացիական անհնազանդության ամբողջ զինանոցը, անցկացնելու են պիկետներ: «Մենք վստահ ենք, որ հաջողության ենք հասնելու»,- ընդգծեց նա:

Մինչ ասուլիսի բանախոսները զրուցում էին լրագրողների հետ, հավաքվեցին տասնյակ մարդիկ, ովքեր, ինչպես իրենք ներկայացան, տեղի բնակիչներն են ու շուկայի վաճառողները: Նրանցից մեկն իր խոսքը սկսեց այսկերպ. «Եթե հուշարձան է, ինչու է պետությունը վաճառել»: Այնուհետև ասաց, որ իրենք հազիվ են «ազատվել կռիսներից», մյուսն էլ՝ «կռիսը ոտքս կծել է, մինչև հիմա ցավում է»: Նրանք վստահ էին, որ շուկան, ի հեճուկս ասուլիսի մասնակիցների պնդումների՝ «հասնելու ենք նրան, որ քանդվի ու վերականգնվի նախական տեսքը», չի քանդվելու. «Արի գռազ գանք, որ չի քանդվելու»: Նրանք նաև վստահ էին, որ վերաբացումից հետո էլ շուկա է լինելու ու իրենք շարունակելու են իրենց առևտուրը:

Նախորդող նորություններ՝
«Փակ» շուկայի մնացորդների ու ավելցուկների «բացմանն ընդառաջ». ճարտարապետ Արսեն Կարապետյանը առաջարկ ունի
Ճարտարապետները դիմել են Տարոն Մարգարյանին` «Կենտրոնական ծածկած շուկայի սեփականատիրոջ նկատմամբ հարուցել դատական գործ»
Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 1
Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 2