«Կոլիզեյը կրկնակի կռիսանոց է, բայց պահում են». Քննարկում՝ «Զվարթնոցի» հին շենքի հարցի շուրջ
«Զվարթնոց» օդանավակայանի հին շենքի գլխին նորից սև ամպեր են կուտակվել: «Արմենիա միջազգային օդանավակայաններ» ընկերությունը, ով վարձակալել է տարածքը, որտեղ գտնվում է շինությունը, դարձյալ բարձրացրել է այն քանդելու հարցը՝ պատճառաբանելով, որ շենքը վատ վիճակում է, կարող է փլվել և իր ֆինանսական միջոցները չեն բավարարում այն պահելու համար: Հին (կլոր) շենքը պահպանելու համար ընկերությունը պետք է այն վերանորոգի, ինչը, ըստ իրենց հաշվարկների, կպահանջի 12 մլն դրամ: Այսօր Հանրային խորհրդում այս հարցի առնչությամբ հանրային քննարկում էր հրավիրվել, որի ժամանակ ճարտարապետները միաձայն հայտարարեցին, որ շենքը քանդել չի կարելի:
ՀԽ քաղաքաշինության և ճարտարապետության ենթահանձնաժողովի նախագահ Գրիգոր Ազիզյանը նկատեց, որ այն ժամանակի լավագույն ճարտարապետական կառույցն էր և իր ճարտարապետական լուծումների համար միջազգային մրցանակի է արժանացել ժամանակին:
Քաղավիացիայի գլխավոր վարչության ներկայացուցիչ Աշոտ Ազիզյանն իր հերթին ասաց, որ ընկերությունը նոր բիզնես պլան է ներկայացրել նախատեսված աշխատանքների մասին, որում նախատեսված են նաև օդանավակայնի հին շենքի քանդման աշատանքներ: «Մենք ունենք խնդիր այդ շենքը պահպանելու համար, այն ընդհանրապես չի օգտագործվում և անմիխիթար վիճակում է գտնվում: Փլվելու վտանգ կա, մենք առաջարկեցինք ներկայացնել պահպանության տարեկան ծախսերը որքան կլինեն, կոնցեսիոները ասել է, որ 10-12 մլն դրամ է հարկավոր, որ վերանորոգվի: Մենք ունենք ֆինանսական խնդիր»,- ասաց նա:
Երևանի քաղաքապետարանի քաղաքաշինության և ճարտարապետության հանձնաժողովի նախագահ Հրաչ Պողոսյանը խնդրեց քաղավիացիայի ներկայացուցչին պարզաբանել, արդյո՞ք ընկերությունը ներկայացրել է քանդելու պատճառներ:
«Ինչի՞ պատճառով է անպայման հարկավոր քանդել: Նպատակները, ինչո՞ւ ենք քանդում, ի՞նչ ծրագրեր կան, որ այդ նպատակները իրականացվեն և դրանց իրականացման ձևերը»,- հարցրեց ճարտարապետը:
Աշոտ Ազիզյանը պատասխանեց, որ ամենամեծ դատավորը հանրության կարծիքն է, որը պետք է հաշվի առնի և՛ կոնսեցիոները, և՛ քաղավիացիայի վարչությունը: «Առաջինը պահպանման ծախսերի և փլուզման վտանգի մասին է խոսքը: Եթե ուղևորափոխադրումների ավելացում ենք նախատեսում, ապա նոր օդանավակայանը մեծանալու է դեպի աջ , ստացվում է որ պիտի քանդեն, որ գործող օդանավակայանը մեծացնեն»,- ասաց նա:
«Թող դեպի ձախ քանդեն»,- արձագանքեց Հրաչ Պողոսյանը:
«Այնտեղ նոր շենքեր են կառուցել, չեն կարող»,- ասաց Ազիզյանը:
«Շատ վատ են կառուցել, թող դրանք քանդեն»,- պատասխանեց Պողոսյանը, ինչին Ազիզյանը պատասխանեց, որ հասկանում է ինչ նկատի ունի ճարտարապետը և չշարունակեց խոսքը:
Ճարտարապետ Գրիգոր Արևշատյանը հետաքրքրվեց՝ կա արդյո՞ք փաստաթուղթ, որը հիմանավորում է, որ կոնկրետ այդքան գումար է հարկավոր այն վերանորոգելու: Կա՞ սեյսմակայության մասին փաստաթուղթ: «Չէ՞ որ այդ օդանավակայանը դեռ մի քանի տարի առաջ գործում էր և խնդիր չի առաջացել»,- նկատեց ճարտարապետը:
Աշոտ Ազիզյանն արձագանքեց. «Նախագծահաշվարկային փաստաթուղթ կա, երևի, օդի մեջ թիվ չէին ասում: Բոլորս գիտեինք ինչպես էր շահագործվում, միշտ իջնելուց կամ բարձրանալուց վտանգ կար: Ինքներդ կարող եք առաջարկներ անել, այն որոշումը, որ կկայացնի հանրությունը կլինի ընդունելի»:
Ճարտարապետների դիտարկումներին, թե «Զվարթնոցի» հին շենքը ճարտարապետական շքեղ կառույց է, այն ավելի շուտ քանդակ է, ոչ թե կառույց, Ազիզյանը պատասխանեց. «Պատասխանողը չգիտեր: Մեր նոր օդանավակայանն էլ է շատ լավը, նա ճանաչվել է լավագույնը նախկին ԽՍՀՄ տարածքում»:
Հրաչ Պողոսյանը նկատեց, որ հարցին պետք է մոտենալ ճարտարապետական հարստությունը պահպանելու տեսանկյունից: «Կոլիզեյն էլ ոչ մի եկամուտ չի բերում: Բոլորվին կարևոր չէ` որքան գումար կպահանջվի: ֆիզիկական վիճակը պատրվակ չէ հուշարձանը քանդելու համար: Մեր պարտականությունը այն պահպանելն է: Շատ շնորհակալ ենք, որ գումարներ են բերում մեր երկիր, բայց պետք է պահպանել այն արժեքները, որոնք ստեղծվել են առանց այդ կոնցեսիոներների»,- ասաց նա:
Ճարտարապետ Սաշուր Քալաշյանն ընդգծեց. «Անշուշտ, արժեքն արժեք է, եթե Փակ շուկան կռիսանոց էր, Կոլիզեյը կրկնակի կռիսանոց է, բայց պահում են: Եթե կոլիզեյը չլինի, հսկայական հարված կհասնի տուրիզմին Հռոմում: Եթե կոնցեսիոները հարկադրված է պահպանել այդ շենքը, վերանորոգելն էլ հարցի լուծում չէ, այն պետք է օգտագորվի: Իսկ այն պետք է օգտագործել` առանց աղճատելու, այնպես պետք է օգտագործեն, որ և՛ ներքին տեսքը պահպանի, և՛ արտաքին:
Ճարտարապետների միության նախագահ Մկրտիչ Մինասյանը նկատեց, որ շատ լավ է, որ քննարկում է սկսվել նախքան շենքի քանդվելը: «Միշտ պատճառ կգտնվի քանդելու, ամենադժվար բանը պահելն է»,- եզրափակեց նա:
Քաղավիացիայի վարչության կողմից Հանրային խորհրդին առաջարկվել էր համատեղ քննարկել հարցը, որպեսզի մինչև վերջնական որոշում կայացնելը հասկանալի լինեն այն գնահատականներն ու մոտեցումները, որոնք առկա են համալիրի նկատմամբ հանրության և ոլորտի մասնագետների կողմից: Անհրաժեշտություն է առաջացել վերջնական գնահատական տալ հին համալիրի կլոր շենքի քանդման կամ պահպանման հարցը: Ֆինանսկան ներդրումներին ու ծախսերը:
Նախորդիվ՝
«Զվարթնոցի» հին շենքը չքանդել. ՀԽ ավիացիոն հարցերով ենթահանձնաժողովի խիստ բացասական կարծիքը
«Զվարթնոց»-ի հին շենք, Ծածկած շուկա. հիշողություններն ու պատմությունները քանդվում են (Տեսանյութ)
Ա. Շխյան. Եթե նախատեսում ենք 5-10 տարի անց մեծացնել օդանավակայանը, ապա հին մասնաշենքը կարող է խոչընդոտ առաջացնել
«Զվարթնոց» օդանավակայանն ուզում են քանդե՞լ. «Մի օրինակ չկա, որ սեփականատերը գներ ու աչքի լույսի պես պահեր»
Լրահոս
Տեսանյութեր
Իմ կարծիքով, շատ տգեղ բան եք անում. Եղոյանը՝ Լուսինե Հակոբյանին
