«Զվարթնոցի» հին շենքը չքանդել. ՀԽ ավիացիոն հարցերով ենթահանձնաժողովի խիստ բացասական կարծիքը
ՀՀ Հանրային Խորհրդի ֆինանսաբյուջետային և տնտեսական հարցերով հանձնաժողովի ավիացիոն հարցերով ենթահանձնաժողովը խիստ բացասական որոշում է կայացրել «Զվարթնոց» օդանավակայանի թիվ 1 շենքի քանդման առաջարկության վերաբերյալ: Այս մասին այսօր «Զվարթնոցի» հին շենքի քանդման հարցի շուրջ Հանրային խորհրդում ընթացող քննարկման ժամանակ հայտնեց ավիացիոն հարցերով ենթահանձնաժողովի ներկայացուցիչ Իզաբելլա Մուրադյանը:
«Կլոր շենքը հնարավորություն է տալիս մեծ ինքնաթիռներ ընդունելու համար, այն թույլ է տալիս դեպի ներս հրել օդանավը և սպասարկել մի քանի մեծ օդանավեր, ինչը չի կարող նոր շենքը: Կլոր շենքում կարող է բացվել նաև տրանզիտ տարածք: Խիստ բացասական կարծիք ունենք այդ շենքի քանդման համար, առաջարկում ենք աջակցել ընկերությանը՝ տարանցիկ գոտի ստեղծելու պլան մշակելու հարցում»,- ասաց նա:
Իզաբելլա Մուրադյանը նաև նկատեց, որ կառավարությունը նախատեսում է բացել նաև մի շարք փոքր օդանավակայաններ: «Կապանի օդանավակայանը կգործի, վաղ թե ուշ կգործի Ստեփանակերտի օդանավակայանը, մենք ունենք փոքր ավիացիայի զարգացման խնդիր, իսկ այդ շենքը շատ հարմար կլինի օգտագործել այդ նպատակներին ծառայեցնելու համար: Մենք մասնագիտական տեղեկանք ենք կազմել և հույս ունենք, որ Կլոր շինությունը կգործարկվի և կծառայի իր նպատակներին»,- ասաց նա:
Որոշմանը քննարկման ժամանակ արձագանքեց Քաղավիացիայի վարչության ներկայացուցիչ Աշոտ Ազիզյանը: «Չի կարող այնպես պատահել, որ հին օդանավակայանը կարողանա մի քանի մեծ օդանավ սպասարկել, նորը՝ ոչ: Նույն օդանավակայանը ավելի լավ պայմաններով է, ավելի շքեղ: Ձեր հանձնաժողովը մի քիչ էլ պետք է կոնցեսիոների տեսանկյունից նայի: Ահռելի ծախսեր է պահանջում միայն նորը սպասարկելու համար: Շատ մեծ ֆինանսական կորուստներ է կրել ընկերությունը, այս օդանավակայանը կարողանում է նաև այդ ծառայությունները իրականացնել: Ֆինասնապաես ձեռնտու չէ այն որպես տրանզիտային գոտի օգտագործելը»,- ասաց Ազիզյանը:
Իզաբելլա Մուրադյանն իր հերթին արձագանքեց, որ տարիներ առաջ կոնցեսիոները եկել էր և ասում էր, որ Կլոր շենքը տեսնում է որպես ազատ տնտեսական գոտի:
«Դրա համար մեծ տարածք են նախատեսել: Այնտեղ հարևանությամբ մեծ շենքեր կան, ընկերությունը անվճար նոր շենքեր է կառուցում, որ այնտեղի բնակիչները տեղափոխվեն և նոր տրազիտային գոտի կառուցվի»,- ասաց նա:
Ենթահանձնաժողովի որոշման մեջ ասված է.
«Հիմնվելով այն փաստի վրա, որ «Զվարթնոց» օդանավակայանի թիվ 1 շենքի քանդման առաջարկությունը խիստ հակասում է Հայաստանի Հանրապետության և ազգային շահերին,
նկատի ունենալով` «Զվարթնոց» օդանավակայանի թիվ 1 շենքի օգտագործման բազմաթիվ գործառույթները, այդ թվում «Արմենիա միջազգային օդանավակայաններ» ընկերության կողմից` 2002թ.-ից հնչեցված, կառավարությանը և հանրությանը բազում անգամ ներկայացված ծրագրերի` այդ թվում շինության և հարակից տարածքում Ազատ Տնտեսական Գոտի հիմնելու, զվարճանքների-հանգստյան գոտի ստեղծելու և այլ ծրագրերը`
ՀՀ ՀԽ ՖԲՏ հարցերով հանձնաժողովի ավիացիոն հարցերով ենթահանձնաժողովը որոշել է.
Առաջարկել Հանրային Խորհրդին ԽԻՍՏ ԲԱՑՍԱԿԱՆ ԿԱՐԾԻՔ տալ «Զվարթնոց» օդանավակայանի թիվ 1 շենքի քանդման առաջարկության վերաբերյալ;
Առաջարկել ՀՀ Նախագահին և կառավարությանը, «Արմենիա միջազգային օդանավակայաններ» ընկերությանը հետամուտ լինել և իրականացնել նախկինում հայտարարված նախագծերը;
Օգտագործել շինության և հարակից տարածքների որոշակի հատվածը որպես ներքին օդանավակայան՝ տարանջատելով արտաքին և ներքին թռիչքները;
Նախատեսել «Զվարթնոց» օդանավակայանի թիվ 1 շենքի օգտագործումը Հայաստանում փոքր ավիացիա զարգացնելու համար»:
Հիշեցնենք, որ Հայաստանի քաղավիացիայի գլխավոր վարչությունը վերջերս դիմել էր Հանրային խորհուրդ` տեղեկացնելով, որ ՀՀ կառավարությունն ու «Զվարթնոց» օդանավակայանի կառավարիչ «Արմենիա միջազգային օդանավակայաններ» ՓԲԸ-ն քննարկում են օդանավակայանի առաջիկա 5 տարիների զարգացման խնդիրները, որի շրջանակներում անհրաժեշտություն է առաջացել վերջնական գնահատական տալու հին ուղևորային համալիրի հետագա պահպանման կամ քանդման խնդրին:
Քաղավիացիայի վարչության կողմից Հանրային խորհրդին առաջարկվել էր համատեղ քննարկել հարցը, որպեսզի մինչև վերջնական որոշում կայացնելը հասկանալի լինեն այն գնահատականներն ու մոտեցումները, որոնք առկա են համալիրի նկատմամբ հանրության և ոլորտի մասնագետների կողմից:
Նախորդիվ՝
Հանրային խորհրդում վաղը կքննարկեն Զվարթնոցի կլոր շենքի հարցը
«Զվարթնոց»-ի հին շենք, Ծածկած շուկա. հիշողություններն ու պատմությունները քանդվում են (Տեսանյութ)
Ա. Շխյան. Եթե նախատեսում ենք 5-10 տարի անց մեծացնել օդանավակայանը, ապա հին մասնաշենքը կարող է խոչընդոտ առաջացնել
«Զվարթնոց» օդանավակայանն ուզում են քանդե՞լ. «Մի օրինակ չկա, որ սեփականատերը գներ ու աչքի լույսի պես պահեր»
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
