Ձեր վստահելի աղբյուրը

Սյունիքի մարզի Թասիկի հիմնական դպրոցը գործում է առանց դպրոցական շենքի: Դասերն արդեն 20 տարուց ավելի է, ինչ անցկացվում են գյուղի մանկապարտեզի՝ 1980 թվականին շահագործված շենքում:

Դպրոցի նախկին շենքը վթարային է եղել, ինչի պատճառով էլ 1994թ.-ից աշակերտները սովորում են մանկապարտեզի շենքի 2-րդ հարկում: Շենքը վաղուց արդեն վերանորոգված չէ, հիմնանորոգման խիստ անհրաժեշտություն կա:

Դպրոցի տնօրեն Հարություն Հարությունյանի խոսքով՝ շինության պատուհանները սովետական ժամանակաշրջանի են, նախկինում երկշերտ են եղել, բայց ժամանակի ընթացքում փտել են, այժմ մնացել է մեկ շերտը: Շինությունը կոյուղի չունի, ջուրն իրենց ուժերով քաշել են բակ, ծորակ ունեն: Տանիքը ևս գտնվում է անմխիթար վիճակում:

Դպրոցի գույքը հին է՝ 20 տարի վաղեմության: Միայն չնչին բաներ են կարողացել ձեռք բերել ուսուցչանոցի համար: Դպրոցը ճաշարան ևս չունի, ծնողներին չեն կարող պարտադրել, որ իրենց միջոցներով գնեն անհրաժեշտ պարագաները. «Մեր գյուղն աշխարհից կտրված է, ձմռանը նույնիսկ 15 ընտանիք էլ չի լինում, չենք կարող որևէ մեկին համոզել, որ գոնե հովանավոր կանգնի»,- Panorama.am-ի թղթակցին ասում է նա:

Տնօրեն Հարություն Հարությունյանը պետական մարմիններին վերանորոգման համար չի դիմել, միայն հասարակական կազակերպությունների, որոնք էլ մերժել են՝ պատճառաբանելով, թե շենքը ոչ թե դպրոցի է, այլ մանկապարտեզի և գտնվում է համայնքային ենթակայության տակ:

Նոր շենք կառուցելու համար էլ է դիմել: Սեյսմիկ պաշտպանության ծառայությունը նախկին շենքը ճանաչել էր 5-րդ կարգի վթարային, քանդման ենթակա, ուստի պետք է կառուցվեր նորը: Տնօրենն արդեն երեք տարի է, ինչ դիմել է մարզպետարանին, բայց որևէ բան դեռ չկա:

Թասիկի հիմնական դպրոցում այս տարի ընդամենը 14 աշակերտ է սովորում, առաջին դասարան երկու աշակետ են ընդունել, դպրոցն ավարտել է մեկ աշակերտ:

«Դասարանները կոմպլեկտավորված են՝ 1-ին դասարանն առանձին է, 2-րդ և 3-րդ դասարանները միասին, 4-5՝ միասին, 6-7՝ միասին, 8-9՝ միասին»,- ասում է Հարութուն Հարությունյանը:

Դպրոցը անհրաժեշտ մանկավարժներն ունի, միայն քիմիայի ուսուցիչ չունեն, բայց այդ դասաժամերը նույնիսկ կես դրույքաչափ չեն, որ կարողանան տեղի համար մրցույթ հայտարարել: Դպրոցում 11 ուսուցիչ է դասավանդում:

Դպրոցը մոտ 8 տարի առաջ 50 ավելի աշակերտ է ունեցել, շատերն արտագաղթել են ու շարունակում են լքել գյուղը: Սոցիալական պայմաները, դպրոցի տնօրենի խոսքով, շատ վատն են. «Ճանապարհ չունենք, դրա մասին խոսելը… երթուղային չունենք, ավտոբուս չկա: Օրինակ, դրսից եկած ուսուցիչները տաքսիով են գալիս, դրանք էլ թանկ են: Ճանապարհը ճանապարհի նման չի, պիտի մի անգամ տեսնեք, որ պատկերացնեք, այդ ճանապարհով նույնիսկ ոտքով չեք կարող անցնել»:

Լուսանկարները տրամադրել է դպրոցի տնօրենը

Երեխաները կրթությունը հիմնականում շարունկում են հարևան գյուղի միջնակարագ դպրոցում, որը 5 կիլոմետր է հեռու: Իսկ ովքեր որ ֆինանսապես, ինչպես նաև գիտելիքի առումով հնարավորություններ ունեն, գնում են Սիսիանի ավագ դպրոց:

Չնայած այս պայմաններին, վերջին տարիների ընթացքում գյուղի աշակերտների 28-ը կրթությունը շարունակել է բարձրագույն ուսումնական հաստատություններում:

Գյուղական դպրոցների մասին շարքի նախորդ պատմությունները՝

Քայքայված ու մաշված. Արտաբույնքի դպրոցի մեծ դասասենյակները տաքացնել չի լինում, ջեռուցումը դուրս է ցնդում

Քանդված տանիքով դպրոցը. Տնօրենը հնամաշ պատուհաններին մի կերպ ապակի է գցում ու ցելոֆաններ փակցնում

Քանդված հատակ, փտած դռներ, առաստաղից երևացող գերաններ և մութ դասասենյակներ. Կուտականի դպրոցը

Դպրոցը՝ նախկին կոլխոզի շենքում. Սալվարդում ընդամենը 15 աշակերտ կա

«Կոմպլեկտավորած դասարանում ուսման որակի հերն անիծվում է». Դպրոցի տնօրենը զենքերը վայր չի դնում

Պատուհանից այն կողմ` ցելոֆաններ երկնքի փոխարեն. Սորիկի աշակերտների երազանքն ու իրականությունը

Դպրոցը՝ վթարային շենքում. Դաշտադեմում մի քանի օրից ընդամենը ինը աշակերտ կմնա

Քայքայված պատեր ու ծակ լուսամուտներ. Վաղատինի դպրոցը

Յոթ աշակերտով դպրոցը, Աճարկուտում քիմիայի լաբորանտն արդեն 15 տարի հայոց լեզու է դասավանդում