«Հո հավերժ նախաքննություն չի՞ գնալու». Զոհված զինծառայողի մայրը` Կոստանյանի հետ հանդիպման մասին
2010-ին Ստեփանակերտի Հայկազով զորամասում մահացած զինծառայող Վալերի Մուրադյանի մայրը Գլխավոր դատախազ Գևորգ Կոստանյանի հետ առանձին մեկ ժամ տևած հանդիպումից Panorama.am-ի թղթակցի հետ զրույցում մանրամասներ է փոխանցել:
«Նա տեղյակ էր մեր գործից և պատրաստակամություն կար մեզ օգնելու: Հանդիպմանը ներկա մյուս պաշտոնյաներին էլ հանձնարարեց, որ մեր միջնորդությունները բավարարեն», -Panorama.am-ի թղթակցի հետ զրույցում հանդիպման մանրամասները ներկայացրեց Վալերի Մուրադյանի մայրը` Նանա Մուրադյանը:
Նկատենք, որ ավելի վաղ գլխավոր դատախազությունից տեղեկացրել էին, որ զոհված զինծառայողների մայրերի հետ հանդիպմանը ներկա են եղել ՀՀ գլխավոր դատախազի տեղակալ, ՀՀ զինվորական դատախազ Արտավազդ Հարությունյանը, ՀՀ պաշտպանության նախարարության քննչական ծառայության պետ Արմեն Հարությունյանը, ՀՀ զինվորական դատախազության, ՀՀ ՊՆ քննչական ծառայության ՀԿԳ բաժնում քննվող գործերով բաժնի պետ Կարեն Հարությունյանը:
Հիշեցնենք, որ ըստ պաշտոնական վարկածի, Վալերի Մուրադյանը 2010թ. մարտի 14-ի լույս 15-ի գիշերը կասկածելի հանգամանքներում մահացել է ԼՂՀ Ստեփանակերտի «Հայկազով» զորամասում: Նրան գտել են կախված վիճակում: Քրեական գործը հարուցվել է ինքնասպանության դրդելու հատկանիշներով, սակայն տղայի մայրը՝ Նանա Մուրադյանը, պնդում է, որ բոլոր փաստերը ցույց են տալիս, որ իր որդուն սպանել են: Վալերի Մուրադյանի մահվան փաստի վերաբերյալ քրեական գործը հարուցվել է և նախաքննությունն իրականացվել է ԼՂՀ-ում, այնուհետև մոտ 3 ամիս անց գործն ուղարկվել է ՀՀ ՊՆ քննչական ծառայություն: Մինչ այժմ գործով մեղադրյալներ չկան:
«Մենք մինչև Կոստանյանի հետ հանդիպումը մի քանի միջնորդություններ էինք ներկայացրել, սակայն դրանք չէին ընդունվել: Բայց Ես Կոստանյանին խնդրեցի, որ միջնորդությունները բավարարվեն, Կոստանյանն էլ ասեց բավարարեք ծնողի միջնորդությունները: Դրանք ես պետք է տանեմ զինդատախազություն», -փոխանցեց տիկին Մուրադյանը:
Մասնավորապես, Նանա Մուրադյանն ասաց, որ իրենք միջնորդությամբ խնդրում են, որպեսզի մեկ անգամ ևս հարցաքննվի Գոռ Սիմոնյանը, որը Արմավիրի մարզից է և Վալերի Մուրադյանի համածառայակիցն է եղել:
Որդուն կորցրած մայրը ասաց, որ Կոստանյանին հիշեցրել է տարբեր լրատվամիջոցներով հնչած նրա իսկ խոսքերը այն մասին, որ Վալերի Մուրադյանը զորամասում ականատեսն է եղել «բազմաթիվ չարաշահումների, նախաքննությունը շարունակվում է, մեղավորները կպատժվեն»:
«Իմ ասածից հետո ինքը զարմացավ, որ էդպես մանրամասնորեն հիշում եմ իր խոսքերը և ասաց, որ նախաքննություն է դեռ ընթանում: Բայց ես էլ ասում եմ, հո հավերժ նախաքննություն չի գնալու, էնքան մինչև մեռնենք-պրծնե՞նք», -ասաց տիկին Նանան:
Նա ասաց, որ դեռ Լեռնային Ղարաբաղում կատարված քննության ընթացքում գործով կարևոր իրեղեն ապացույց աթոռի վրայից, որի վրա իբրև բարձրացել և կախվելու միջոցով ինքնասպան է եղել Վալերի Մուրադյանը, մատնահետքեր չեն վերցվել:
«Այդ աթոռը իմ տղան չի բերել այդտեղ, այլ` մարդասպանը, որն էլ իմ երեխուն կախել է», -նշեց Նանա Մուրադյանը:
Նրա փոխանցմամբ, նույն հանդիպման ընթացքում, երբ ինքը ներկայացրել է այս և այլ հանգամանքներ ևս, պաշտոնյաները դժգոհություն են հայտնել Վալերի Մուրադյանի գործով քննիչների աշխատանքից:
«Եվ Արտավազդ Հարությունյանը, և քննչականի պետ Արմեն Հարությունյանը, ասել են, որ քննիչների անփութության պատճառով ի սկզբանե փչացնում են գործը, հետո էլ բացահայտելը դժվարանում է: Ես էլ ասում եմ` եթե փչացրել է գործը քննիչը, ուրմեն իրա վզից բռնեք, բա իրան բերեք, պատասխանատվության ենթարկեք, մարդ են սպանել չէ՞», -հանդիպման մանրամասները փոխանցեց տիկին Նանան` նշելով, որ մի քանի քննիչներ են փոխվել այս գործով, սակայն ոչ մի արդյունք:
Նախորդող հրապարակում`
Գևորգ Կոստանյանը հանդիպել է զոհված զինծառայողների մայրերին (Տեսանյութ)
Զոհված զինծառայողների մայրերը` Կոստանյանի հետ հանդիպումից առաջ (տեսանյութ)
Զինվորի ինքնասպանության գործով դատական նիստը հետաձգվեց. Փաստաբանը կոչ է անում մերժողական մոտեցումից զերծ մնալ
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
