Ձեր վստահելի աղբյուրը

Ինչպես ավելի վաղ տեղեկացրել էինք, այսօր Երևանում անցկացված «Պատասխանատու հանքարդյունաբերության կայացումը Հայաստանում. հնարավորություններ և մարտահրավերներ» համաժողովի ժամանակ, մի խումբ բնապահպաններ դիմել են բնապահպանության նախարար Արամ Հարությունյանին՝ առաջարկելով խմել պղտոր ջուր` բերված Սյունիքի մարզի Գեղի գետից, որը թունավորվում է Հանքասարի հանքավայրի պոչամբարի նյութերով:

Ակտիվիստ Աննա Շահնազարյանի առաջարկած ջուրը փորձեց խմել ՀՀ էկոնոմիկայի նախարար Վահրամ Ավանեսյանը, սակայն հետո հրաժարվեց` ասելով, թե ինչ գիտի, որտեղից են բերել:

Այնուհետև ակտիվիստները սկսեցին վանկարկել «ամոթ, ամոթ», ինչին ի պատասխան բնապահպանության նախարար Արամ Հարությունյանն ասաց. «Ամոթը բոլորիդ: Առանց հասկանալու, առանց գրագիտություն իմանալու, առանց պատկերացնելու խոսում եք, իմացեք՝ որտեղ ինչ եք խոսում, հիմարություններ դուրս չտաք: Մի երկու հատ էլ գործից հասկացող բերեք առաջ` պատասխանները տամ»:

Իսկ երբ ակտիվիստներից մեկը հիշեցրեց նախարարության նախկին աշխատակից Արծրուն Պեպանյանի բնորոշումն այն մասին, որ բնապահպանության նախարարությունը «գերեզմանոց է», Արամ Հարությունյանը վրդովված ասաց. «Չափդ ճանաչի, ականջներդ կպոկեմ ձեռդ կտամ, լակոտ»:

Դրանից հետո նախարարը փորձեց դուրս գալ դահլիճից, սակայն մուտքի մոտ բնապահպան Աննա Շահնազարյանի հետ վեճի բռնվեցին:

«Բնապահպանությունը թողեք մասնագետներին, դուք ընդամենը ասֆալտ գցող եք, դուք ընդամենը կարողանում եք ավիրել։ Դուք վերացրել եք Ջերմուկի ազգային պարկը»,- վրդովված գոռում էր ակտիվիստը։

Իսկ նախարարը կրկնում էր. «Դուք պետք է դիմեք բժշկի, դուք հիվանդ եք, աղջիկ ջան»:

Բնապահպանի հարցին, թե որպես նախարարը մինչ օրս ինչ է արել, Ա.Հարությունյանը նշեց, որ ստեղծել է երկու ազգային պարկ, ինչպես նաև`«Ջերմուկ» ջրաբանական արգելավայրը:

«Շատ վատ եք արել, որ կրճատել եք ազգային պարկի տարածքը, հանել եք Ամուլսարը և անունը դրել եք ջրաբանական արգելավայր»,- հակադարձեց բնապահպանը՝ նախարարին ասելով, որ ինքը կարող է ապացուցել` իրենք արգելավայրի նախագծից հանել են Ամուլսարի տարածքը:

«Ես կարող եմ ապացուցել, դա կա բնապահպանության նախարարության պաշտոնական փաստաթղթերում, այդ մասին ամրագրված է նաև կենսաբազմազանության միջազգային կոմիետի փաստաթղթերում»,- ասաց Ա.Շահնազարյանը, ինչին ի պատասխան նախարարը նշեց. «Չեք կարող»:

Բնապահպանն էլ նախարարին ասաց. «Սուտ եք ասում, դուք տարիներ շարունակ գրել եք, որ «Ջերմուկ» ազգային պարկ եք ստեղծելու, իսկ հիմա Ամուլսար եք տալիս»:

Արամ Հարությունյան էլ բնապահպանին ստախոս անվանեց. «Լսում եք, ոչ մի բառակապակցություն իրականությանը չի համապատասխանում, ուղղակի բարձր գոռում է: Ես ամենայն պատասխանատվությամբ ասում եմ և բոլորիդ փաստաթուղթը կներկայացնեմ, որ մենք` որպես բնապահպանության նախարարություն, Ջերմուկում ստեղծել ենք «Ջերմուկ» ջրաբանական արգելավայր»:

Հիշեցնենք, որ «Պատասխանատու հանքարդյունաբերության հաստատում. մարտահրավերները և հնարավորությունները» խորագրով միջազգային կոնֆերանսին մասնակցում էին Հայաստանում ԱՄՆ, Մեծ Բրիտանիայի և Գերմանիայի դեսպանները, մի շարք միջազգային կառույցների ներկայացուցիչներ:

Տեսանյութը` «Ազատություն» ռադիոկայանի

Նախորդող`
«Անվստահություն ունենք վարչապետի ցանկացած քայլի և առաջարկի նկատմամբ». Բնապահպանները դեռ պետք է քննարկեն վարչապետի առաջարկը

Վարչապետը չներկայացավ համաժողովին, բայց կառավարությունում կընդունի բնապահպան ակտիվիստներին

Ալտեր-կոնֆերանսի մասնակիցները մտան դահլիճ՝ նախարար Ա. Հարությունյանին առաջարկելով մեկ բաժակ պղտոր ջուր (տեսանյութ)