«Ռազմագիտություն» առարկա և արտաուսումնական խմբակ. Ինչ խնդիրներ կան ու ինչին են ուղղվում գումարները
«Պատանի երկրապահ» ակումբի մարտավարական, կրակային և շարային գործընթացը բնականոն կազմակերպելու նպատակով Կառավարությունը ՀՀ կրթության և գիտության նախարարությանը հատկացրել է 60 մլն դրամ: Սա այն դեպքում, երբ դպրոցներ կան, որտեղ պարտադիր «Ռազմագիտություն» առարակայի համար անհրաժեշտ կահավորումը և ուսումնական զենքը բացակայում են:
ԿԳՆ մարզառազմական և արտաուսումնական դաստիարակության վարչության պետ Արման Այվազյանը կարծում է, որ չի կարելի կենտրոնանալ մի բանի վրա: Նրա պնդմամբ, առարկան զարգացվում է ոչ միայն Կրթության և գիտության, այլև Մշակույթի, Արտակարգ իրավիճակների, Առողջապահության, Պաշտպանության նախարարությունների կողմից:
«Առարկայի շրջանակներում այդ նախարարություններն աշխատում են համատեղ: Մենք ունենք ծրագրեր, ունենք դասագրքերը, 90 տոկոս կահավորված դասարաններ: Ոչ մի ուրիշ առարկա այդքան նյութատեխնիկական բազա չունի, որքան սա: Պետք է հավասարաչափ բոլորը զարգացնել»,- Panorama.am-ի թղթակցի հետ զրույցում ասաց ԿԳՆ ներկայացուցիչը:
Արտաուսումնական խմբակ համարվող ակումբի գործունեությունը Արման Այվազյանը խիստ կարևորում է, և կարծում է, որ չպետք է դրա հաշվին լինի առարկայի զարգացումը. «Անտեսենք արտադպրոցական դաստիարակությունը և միայն խորանանք հիմնական կրթության վրա, դպրոցականների կրթությունը չի լինի լիարժեք»:
Ինչ վերաբերում է նշված խմբակներին, ԿԳՆ վարչության պետի խոսքով, դրանք գործում են բոլոր մարզերում ու Երևանում: Հաճախելիությունը վերջին տարիներին հատկապես բաձր է, երեխաները՝ որգևորված:
Նա նշեց, կան դպրոցներ, որտեղ ուղղակի ռազմագիտության խմբակներ են բացում, որոնց ընթացքում ներկայացվում է ճակատամարտերի պատմությունը, շարային պատրաստություն են անցնում:
«Տեսել եմ 40 աշակերտից բաղկացած խմբակ, որը երկու-երեք ժամի ընթացքում երեխաներին շատ բան է տալիս»,- ասաց Արման Այվազյանը:
Հարցին՝ արդյո՞ք առարակայի ժամին չստացած գիտելիքների պատճառով է երեխան գնում խմբակ, նա պատասխանեց. «Առարկայի շրջանակներում մենք պակաս չունենք: Մենք ունենք լրացված ծրագիր, որն ըստ դասաժամերի անցնում են: Յուրաքանչյուր խմբակ միանշանակ լրացնում է առարկան: Առարկայի շրջանակներում երեխայի հետաքրքրությունները տարբեր են: Չի կարելի մի առարկայի շրջանակներում տալ լիարժեք կրթություն: Եթե երեխան հետաքրքրված է, պետք է ավելին: Խմբակներ գնում են այն երեխաները, որոնք լրացուցիչ հետաքրքրություն ունեն, իսկ խմբակը երեխային կտրում է փողոցից»:
Դիտարկմանը, որ գյուղական շատ դպրոցներում նույնիսկ նորմալ պայմաններ չկան, ուր մնաց «Ռազմագիտություն» առարկայի լիարժեք կաբինետ, արդյո՞ք բացեր չկան, որ պետք է լրացվեն, նա արձագանքեց, որ դրանք շատ չեն:
«Ես ասում եմ՝ դպրոցների 90 տոկոսը կահավորված է: ՊՆ խորհրդականն անընդհատ լինում է մարզերում, յուրաքանչյուր դպրոցի համար տվյալ է բերում: Եթե բացեր են լինում, միանգամից հանձնարարվում է բացը լրացնել: Դրա արդյունքում է, որ ասում եմ՝ մենք ունենք կահավորված դասարաններ, պաստառներ, ուսումնական զենք»,- մանրամասնեց Արման Այվազյանը:
Դպրոցներում «Ռազմագիտություն» առարկայի հագեցած դասարանների առկայության մասին փորձեցինք տեղեկանալ հենց դպրոցներից:
Վայոց ձորի մարզի Արտաբույնքի միջնակարգ դպրոցում միակ նորմալ դասարանը «Ռազմագիտություն» առարկայինն է: Տնօրեն Մեսրոպ Բաբայանը Panorama.am-ի թղթակցի հետ զրույցում ասաց. «Խորհրդային ժամանակներից մնացել էր, ավելացվել է: Նախորդ տարի պաստառներն են թարմացրել: Կահավորվածության առումով միայն դա է նորմալ: Ուսումնական զենք էլ ունենք»:
Նույնը չի կարելի ասել Լոռու մարզի Յաղդանի հիմնական դպրոցի մասին: Դպրոցն այս պահին նույնիսկ ուսուցիչ չունի: Հայտարարություն արդեն մեկ տարի է՝ տվել են, բայց դեռ ցանկացողներ չկան: Գյուղը քաղաքից շատ հեռու է, նորմալ ճանապարհներ չկան, աշխատավարձն էլ ցածր է: Հարևան գյուղի դպրոցի ուսուցիչն է համատեղությամբ պարապում:
«Դասարան է: Որ ասենք խիստ առանձին պայմաններում, չէ: Պարզապես հիմա մեթոդական պաստառ ստացանք, որ դասերը կարողանանք պարապենք: Հիմնականում դա է: Բայց զենք, առարկաներ, որ կարողանանք երեխաներին ցուցադրել, չունենք»,- Panorama.am-ի թղթակցի հետ զրույցում ասաց դպրոցի տնօրեն Անահիտ Սիմոնյանը:
Մի կողմ դնելով արտաուսումնական խմբակին հատկացված կլորիկ գումարը, հարկ է ուշադրություն հրավիրել դպրոցներում առարկայի խնդիրներին: Հուսանք, որ մի օր էլ նույն Կառավարության նիստում որոշակի հատկացումներ կուղղվեն պարտադիր առարկան պարապելու համար բոլոր դպրոցներին անհրաժեշտ պարագաների տրամադրմանը:
Նախորդող հրապարակում՝
60 մլն դրամ` «Պատանի երկրապահ» ակումբին. ԿԳՆ վարչության պետի հիմնավորումը
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
