Ձեր վստահելի աղբյուրը

3-ամյա Արեգը դեռ մեկ և կես տարեկանից հերթագրվել է Երևանի թիվ 2 մանկապարտեզ (Կենտրոն վարչական շրջան) հաճախելու համար, սակայն մինչ այժմ մանկապարտեզից չեն արձագանքել Արեգի դիմումին: Ավելին, Արեգի մայրը` տիկին Կարինեն, Երևանի թիվ 2 մանկապարտեզի տնօրենից վերջերս հետաքրքրվել է իրենց դիմումի ճակատագրի մասին, սակայն այստեղ նրան հույս չեն տվել, որ երեխան կկարողանա մոտ ապագայում հաճախել մանկապարտեզ:

Նույնիսկ իրազեկել են նոր կարգի մասին, որի համաձայն, այլ վարչական շրջաններից երեխաներ չեն ընդունում: Երևանի թիվ 2 մանկապարտեզի տնօրեն Զարուհի Արզումանյանը, երբ տեղեկացավ, որ լրագրողի հետ է խոսում, ասաց, որ բոլոր մեզ հետաքրքրող հարցերով պետք է դիմենք քաղաքապետարան, բավական կոպիտ տոնով փոխանցեց, որ զբաղված է ու կախեց հեռախոսը:

Մանկապարտեզում իրավիճակը հստակ պատկերացնելու համար ստիպված էինք դարձյալ զանգահարել, բայց այս անգամ ներկայացանք որպես ծնող: Տիկին տնօրենն ասաց, որ իրենց մոտ հերթագրված երեխաների քանակը շատ է, և 2011 թվականին ծնված երեխայի` այս օրերին հերթագրվելու դեպքում սեպտեմբերին մանկապարտեզ հաճախելը «բացառվում է»:

«Գիտեք, 11 թվին ծնված էնքան հերթագված երեխա կա, որ ես չեմ կարող ասել հերթը երբևիցե կհասնի՞, թե՞ ոչ: Սեպտեմբերին բացառվում է, եթե ընթացքում տեղ կբացվի, կլինի, եթե ոչ, չի լինի», -բավական անվրդով ասաց տնօրենը:

Մայրաքաղաքի բոլոր մանկապարտեզներում նման վիճակ է տիրում. նախ բոլոր մեր զրուցակից տնօրենները, երբ տեղեկանում էին, որ լրագրող է իրենց հետ խոսում, կարծես վախենային խոսել և հորդորում էին հարցերն ուղղել քաղաքապետարանի համապատասխան վարչություն:

Երևանի թիվ 6 մանկապարտեզի տնօրենն անկեղծ էր. «Մեզ ասել են լրագրողների հետ չշփվենք»: Սակայն չասաց, թե կոնկրետ որտեղից են նման հրահանգ ստացել:

Մեր հարցերին պատասխաններ ստանալու համար Երևանի թիվ 22 մանկապարտեզի տնօրենը մեզ ուղղորդեց Արաբկիրի թաղապետարանի կրթության վարչություն, որի պետ Գայանե Հարությունյանն իր հերթին ասաց, որ իրավասու չէ հարցերին պատասխանել. «Դրա համար կա հատուկ ընթացակարգ, պետք է խոսեք քաղաքապետարանի կրթության վարչության պատասխանատուների հետ»:

Թիվ 27 մանկապարտեզի նոր տնօրեն տիկին Վարդանյանը շատ հանգիստ տոնով ասաց, որ կարող ենք մոտենալ և բալիկին հերթագրել օրերից մի օր մանկապարտեզ հաճախելու համար, սակայն երաշխիք չտվեց, որ դա շուտ կլինի:

«Ներկա պահին մեր խմբերը ծանրաբեռնված են, պետք է սպասեք, որ տեղ ազատվի, կանչենք, ընենց չի, որ այսօր ազատվի այդ տեղը, վաղը կանչենք երեխային մանկապարտեզ: Ես երաշխիք չեմ տալիս, որ ձեր երեխան կարող է ասենք, սեպտեմբերին գալ մանկապարտեզ, որովհետև հերթի մեջ գտնվող երեխաները շատ են», -փոխանցեց մանկապարտեզի տնօրենը:

Նա ասաց, որ օրինակ 2010 թվականի ծնված երեխաների մեկ խումբ կա մանկապարտեզում, որում էլ` 30 երեխա:

Երևանի քաղաքապետարանի կրթության վարչության պետ Գայանե Սողոմոնյանը մեր հեռախոսազանգերին չպատասխանեց: Սակայն իր վերջին հարցազրույցներից մեկում խնդրի հետ կապված ասել էր, որ նոր մանկապարտեզներ բացել չեն կարող, իսկ բյուջետային միջոցներն ուղղվում են մանկապարտեզներում գույքի ու տեխնիկայի նորացմանը: Նա նույնիսկ ասել էր, որ ուրախ է, որ հերթեր են գոյանում` չէ որ ծնելիությունը շատանում է, հետևաբար հերթերն էլ պետք է լինեն:

Մինչդեռ Արեգի մայրը Գայանե Սողոմոնյանի նման ուրախ չէ. ամեն օր աշխատանքի գնալիս երեխային «հանձնում է» մեծահասակ տատի խնամքին, այնինչ երեխան կարող էր շփվել, մեծանալ իր հասակակիցների հետ այլ միջավայրում:

Նախորդող հրապարակումներ`

Մանկապարտեզներ, որոնց դռները փակ են շատ երեխաների առջև

Հարցեր, որոնք քաղաքապետարանը թողեց անպատասխան

Դեռ ինչքան ժամանակ մանկապարտեզի մեկ խմբում պետք է լինի 35-40 երեխա. Քաղաքապետարանի հստակ պատասխան չկա