Ձեր վստահելի աղբյուրը

Աֆրիկյանների ակումբի շենքի ֆասադից արդեն 6-ից ավելի քարեր են հանել այսօր առավոտից մեկնարկած ապամոնտաժման աշխատանքների արդյունքում: Մինչ աշխատանքների մեկնարկը տարածքից բացակայում էր իրազեկման վահանակը:

«Նոր են փակցնում վահանակը, բայց արդեն ապամոտնաժում է տեղի ունեցել: Ասում ենք ներկայացրեք նախագիծը, լիցենզիան, չկա: Չենք խոսում մյուս անօրինականությունների մասին: Թույլ չեն տալիս մտնենք տարածք` պատճառաբանելով, թե մասնավոր տարածքում շինարարություն է գնում: Տարածքը հանրային գերակա շահ է ճանաչված, մասնավոր չէ, կլինի այն ժամանակ, երբ այստեղ արդեն իրենք կառուցապատում արած լինեն: Թույլ չեն տալիս մտնենք շինհրապարակ, ֆիքսենք, որ անօրինականություն է տեղի ունեցել»,- շենքի մոտ եկած Երևանի ավագանու «Բարև Երևան» խմբակցության անդամ Անահիտ Բախշյանին իրավիճակը ներկայացրեց ճարտարապետ Սարհատ Պետրոսյանը:

Անահիտ Բախշյանը փորձեց մտնել շինհրապարակ, սակայն ոստիկանության փոխգնդապետ Մանուկյանը թույլ չտվեց: Միայն փոխոստիկանապետին մի քանի անգամ զանգից հետո եղավ համաձայնությունը` այն էլ առանց լրագրողի և լուսանկարչի:

«Դուք գիտե՞ք, որ պաշտպանում եք անօրինականությունը»,- ոստիկաններին դիմեց քաղաքապետարանի ավագանու անդամը:

Շինհրապարակից վերադառնալուց հետո Անահիտ Բախշյանը նկարագրեց, թե ինչ է կատարվում ներսում. «Դիմացի պատին մոտենալու հնարավորություն չկա: Երեք հարթակ է սարքած, վերևում` աջ կողմից սկսել են քանդել: Առայժմ ֆասադին քիչ վնաս է տրվել, եթե ժամանակին դատարանը կասեցնի, ֆասադն իմ կարծիքով, կփրկվի»:

Panorama.am-ի թղթակից հետ զրույցում ճարտարապետ Սարհատ Պետրոսյանը հայտնեց, որ իրենք դիմել են վարչական դատարան` ապօրինի ապամոնտաժման փաստով, նաև միջնորդություն են ներկայացրել ապամոնտաժման աշխատանքները դադարեցնելու մասին. «Երեկ մուտք է արվել, հավանաբար, երկուշաբթի կլինի որոշում»:

Սարհատ Պետրոսյանը նկատեց, որ մինչև երկու տարի առաջ ներսի փայտյա պատշգամբները կային, շենքն անհամեմատ ավելի լավ վիճակում էր: Հիմա մնացել է միայն ֆասադը:

Տեսանյութն ու լուսանկարը` «Պահպանենք Աֆրիկյանների ակումբի շենքը» նախաձեռնության ֆեյսբուքյան էջից:

Նախորդող հրապարակումներ`

Աֆրիկյանների ակումբի շենքի ֆասադից քարեր են հանում

«Հին Երևան» նախագծի հեղինակի վերաբերմունքը` մի քանի հարցի պատասխանով