Ձեր վստահելի աղբյուրը

Աֆրիկյանների ակումբի շենքի ապամոնտաժման դեմ պայքարող քաղաքացիներն այսօր երթով գնացել են Մշակույթի նախարարություն և պահանջել նախարարի հետ հանդիպում:

Ճարտարապետ Սարհատ Պետրոսյանը Panorama.am-ի թղթակցի հետ զրույցում հայտնեց, որ իրենց ասել են, թե նախարարը տեղում չէ, առաջարկել են հանդիպել նախարարության ներկայացուցչի հետ, սակայն հրաժարվել են:

Նա նկատեց, որ այսօր ևս հաշվի չի առնվել Մշակույթի նախարարության` ապամոնտաժումն անմիջապես դադարեցնելու մասին գրությունը և քանդման աշխատանքները պարբերաբար վերսկսվում են:

«Պահպանենք Աֆրիկյանների ակումբի շենքը» նախաձեռնության անդամ Մաքս Սարգսյանը Panorama.am-ի հետ զրույցում ասաց, որ շատ անխնա են քարեր քանդում ու վնասում են:

«Բանվորները քանդում էին նենց, ոնց հասներ: Համեմատաբար նուրբ իջացնում են, բայց քանդման պրոցեսն այնպես չէր, ինչպես պիտի վարվեին հուշարձանի հետ: Խփելով, նետելով, քարերը գլորելով բերում էին վերջնամաս, որտեղ կռունկն է. կապելով իջեցնում էին»,- պատմեց նա:

Հավելենք, որ ըստ Սարհատ Պետրոսյանի, վերջին օրերին ապամոնտաժման արդյունքում շենքի մոտ 10 տոկոսն արդեն քանդվել է:

Նախորդող հրապարակումներ`

Աֆրիկյանների շենքի ապամոնտժաժումը` հանցագործություն իրավապահների աչքի առաջ

Աֆրիկյանների ակումբի շենքի ֆասադային մասում վերսկսվել են առանց թույլտվության աշխատանքները

Ինչ է կատարվում Աֆրիկյանների շենքի ներսում (Տեսանյութ)

Աֆրիկյանների ակումբի շենքի ֆասադից քարեր են հանում

«Հին Երևան» նախագծի հեղինակի վերաբերմունքը` մի քանի հարցի պատասխանով