Ձեր վստահելի աղբյուրը

Աֆրիկյանների ակումբի շենքի ապամոնտաժումն և տեղափոխումը վիճարկող հայցը Վարչական դատարանը դեռ վարույթ չի ընդունել: Դատարանին օրեքով տրված ժամկետը լրանում է հունիսի 27-ին: Մինչ հայցվոր կողմը սպասում է դատարանի որոշմանը, շենքի ապամոնտաժումը մեծ թափով ընթանում է, իսկ ներկայացրած հայցադիմումին զուգահեռ հայցվոր կողմը նաև միջնորդություն է ներկայացրել, որպես հայցի ապահովման միջոց, կասեցնել շենքի ապամոնտաժումը։

Panorama.am-ի թղթակցի հետ զրույցում Հայաստանի հելսինկյան կոմիտեի փաստաբան Ռոբերտ Ռևազյանը նշեց, որ միջնորդությանը դատարանը պետք է անդրադառնա երկու օրվա ընթացքում, սակայն սահմանված չէ`այդ երկու օրը պետք է լինի վարույթ ընդունելուց, թե գործը դատարան ներկայացնելուց հետո:

«Ես կարծում եմ, որ վարույթ ընդունելու որոշումից հետո դատարանը կանդրադառնա նաև միջնոդրությանը»,- ասաց նա:

Գործով հայցվոր կողմի ներկայացուցիչ, իրավապաշտպան Արտակ Զեյնալյանը Panorama.am-ի հետ զրույցում ասաց, որ իրավունքի էությունից բխում է, որ միջնորդության շուրջ որոշումը պետք է վարույթ ընդունելու որոշման հետ միաժամանակ լինի:

«Հայցը նաև ստանում է պատասխանողը, և կարող է ձեռնարկել միջոցներ, որպեսզի իմաստազրկվի պրոցեսն ընդհանրապես: Դրա համար դա պետք է հնարավորինս սեղմ ժամկետներում լինի: Իրավական պետությունում դժվար է պատկերացնել, որ դատարանը չկասեցնի, հայցի ապահովման միջոց չկիրառի: Բայց Հայաստանի պարագայում դժվար է, անկանխատեսելի»,- ասաց իրավապաշտպանը:

Նշենք, որ հայցով պահանջվում է առ ոչինչ ճանաչել Կառավարության 26.08.2005.թ-ի թիվ 185-Ա և Երևանի քաղաքապետարանի 25.01.2007թ-ի թիվ 108-Ն որոշումները, որոնցով էլ այսօր ապամոնտաժվում և տեղափոխվում է հուշարձանը:

Աֆրիկյանների շենքի համար պայքարող քաղաքացիները շենքի ապամոնտաժման անօրինակության փաստարկ են բերում ԱԺ կողմից 2008 թվականին վավերացված Եվրոպայի ճարտարապետական ժառանգության պաշտպանության մասին կոնվենցիա, որի 5-րդ հոդվածում, մասնավորապես, նշված է, որ «յուրաքանչյուր կողմ պարտավորվում է արգելել պահպանվող որևէ հուշարձանի ամբողջական կամ մասնակի տեղափոխումը, բացի այն դեպքի, երբ այդպիսի հուշարձանի նյութական պահպանությունը հրամայաբար պահանջում է այն տեղափոխել...»:

Նաև նշում են Սահմանադրության 6-րդ հոդվածը, որով ամրագրված է. «Միջազգային պայմանագրերը Հայաստանի Հանրապետության իրավական համակարգի բաղկացուցիչ մասն են: Եթե վավերացված միջազգային պայմանագրում սահմանվում են այլ նորմեր, քան նախատեսված են օրենքներով, ապա կիրառվում են այդ նորմերը»:

Նախորդող հրապարակումներ`

Աֆրիկյանների շենքի ֆասադի զգալի մասն արդեն չկա (Տեսանյութ)

Նախարարությունը փորձում է պարզաբանել Աֆրիկյանների շենքի «քանդումն ու տեղափոխումը»