Ձեր վստահելի աղբյուրը

Ամեն տարի Ադրբեջանում ավելի քան հազար դեպքով մեծանում է հղիության ընդհատման թիվը: Այն, որ դրանց մեծ մասը հենց սելեկտիվ (ընտրովի՝ ըստ սեռի) հղիության ընդհատման հաշվին է, ասվում է 2014 թվականի վիճակագրության մեջ. նորածինների 53,6 տոկոսը տղաներ են, 46,4 տոկոսը՝ աղջիկներ: Արդեն որերորդ տարին է՝ նորածին տղաների թիվը գերազանցում է լույս աշխարհ եկած աղջիկների թվին: Այս մասին հաղորդում է ադրբեջանական 1news.az լրատվական կայքը:

Նյութում ասվում է, որ Ադրբեջանում ներդրվելու է աղջիկների ծնողներին խրախուսող նոր համակարգ:

«Եթե որևէ ընտանիքում ծնվի երկրորդ աղջիկը, նրա անունով կբացվի հաշվեհամար, որի վրա էլ կփոխանցվի 10 հազար մանաթ»,- հայտարարել է Տնտեսական և սոցիալական զարգացման կենտրոնի նախագահ Վյուղար Բայրամովը:

Սակայն կայքի թղթակցին չի հաջողվել ստանալ ասվածի հաստատումն Ադրբեջանի Աշխատանքի ու բնակչության սոցիալական պաշտպանության նախարարությունից:

Ընդ որում՝ Oxu.az կայքին տված հարցազրույցում Caspian International Hospital-ի գլխավոր բժիշկ Նիգյար Ահունդովան նշել է, թե Ադրբեջանում հղիության արհեստական ընդհատման պատճառը բարոյական արժեքների հետընթացն է, կին-մայր դերի համահարթեցումը, իսկ դա անթույլատրելի է: Չէ՞ որ չծնված յուրաքանչյուր աղջիկ նշանակում է նաև նրանից չծնված երկուսից-երեք երեխա: Իսկ մի մի քանի տարի անց դա հանգեցնելու է ժողովրդագրական աղետի:

«Այլ կերպ ասած, տասնյակ տարիներ անց ոչ ոք չի լինի, ում հետ մեր տղաները կկարողանան ամուսնանալ: Իսկ այստեղից էլ և ծագում են այնպիսի խնդիրներ, ինչպիսիք են համասեռամոլությունը և մեր մենթալիտետին օտար սեռական հարաբերությունների քարոզումը»,- ընդգծել է Ահունդովան` հավելելով, որ պատճառներից մեկն էլ ադրբեջանական հասարակությունում ստեղծված կարծրատիպն է այն մասին, թե հատկապես հայրերը հաճախ շատ են ցանկանում ունենալ ժառանգորդ, այսպես ասած՝ սերնդի շարունակող, իսկ աղջկան նայում են որպես երկրորդական մի բան:

Զրույցում Ահունդովան նաև իր տեսակետն է հայտնել Ադրբեջանում տարածված արյունակից հարազատների միջև ամուսնությունների առնչությամբ:

«Ընդհանրապես, եթե հիշենք վերջին դարերում տարբեր վեպերի և նովելների ստեղծման պատմությունները, զարմիկի կամ զարմուհու նկատմամբ սերը միշտ արդիական է եղել և գովերգվել: Այլ բան է, երբ վերջինս զանգվածային բնույթ է կրում: Ընդհանուր առմամբ, ինչպես ցույց է տալիս վիճակագրությունը, այդպիսի ամուսնությունների արդյունքում ծնված երեխաների մոտ ծագումնաբանական խախտումները այդքան էլ բարձր չեն: Բացառություն են կազմում որոշ պաթալոգիաների ընտանեկան ժառանգության դեպքերը: Ցանկացած դեպքում, եթե կա արյունակցական կապ, դա բնավ խուճապի պատճառ չէ, այլ պարզապես՝ ծագումնաբանական խորհրդատվության առիթ»:

Նյութեր թեմայի շուրջ՝
ՄԱԿ-ում քննարկել են Ադրբեջանում վաղ ամուսնության, մարմնավաճառության, հղիության ընդհատման և կանանց նկատմամբ բռնության խնդիրները