Ձեր վստահելի աղբյուրը

«Մեր ուշադրության կենտրոնում է ոչ միայն Աշտարակի Վարդգես Պետրոսյանի անվան դպրոցը, այլև ամբողջ մարզի կրթական վիճակը»,-լրագրողների հետ հանդիպմանն այսօր հայտարարեց Արագածոտնի մարզպետարանի աշխատակազմի կրթության, մշակույթի և սպորտի վարչության պետ  Մամիկոն Աբգարյանը:

Հիշեցնենք, որ այդ դպրոցի ուսուցիչներն ու աշակերտները դպրոցի ոչ բարվոք լինելու պատճառով անժամկետ դասադուլ են հայտարարել:

Վարչության պետը նշեց, որ այդ պաշտոնին նշանակվել է 3 ամիս 5 օր առաջ, գրեթե միաժամանակ մարզպետն է փոխվել:

«Ծնողները հարց էին բարձրացել, որ շենքային պայմանները բավարար չեն: Դպրոցում սովորում է 601 աշակերտ, որից 293-ը՝ տարրական դասարաններում, 308 աշակերտ՝ 5-9-րդ դասարաններում: Մինչ դասադուլ հայտարարելը, խնդրի մասին տեղյակ է եղել նաև մարզպետը, իր պաշտոնավարման կարճ ընթացքում մոտ 30 անգամ հարցը բաձրացվել է և քննարկվել»,-ասաց մարզպետարանի պաշտոնյան:

Օգոստոսի 30-ին մարզպետը, մարզպետարանի աշխատակազմի ղեկավարն ու Մամիկոն Աբգարյանը եղել են դպրոցում, ծանոթացել են իրավիճակին, դիմել են կառավարությանը: Նա նշեց, որ Արագածոտնի մարզում և Հայաստանում կան ավելի վատ շենքային պայմաններ ունեցող դպրոցներ:

«Համարել, որ այստեղ խնդիրն ավելի հին է, այդպես չեմ գտնում: Ես կրթության քաղաքականության իրականացումը չեմ պայմանավորում միայն շենքային պայմաններով»,-ասաց նա:

Ինչ վերաբերում է շենքի վթարային լինելուն, ապա վարչության պետն ասաց. «Դպրոցի տնօրինությանը մենք հանձնարարել էինք, որ «Սեյսմշին» ընկերության հետ կարող է պայմանագիր կապել ու որոշել, արդյոք այդ շենքը սեյսմակայո՞ւն է, թե՞ ոչ: Մինչ այս պահը մենք չունենք որևէ գնահատական: Այնպես որ շենքից ծերպեր են թափվում, ճեղքեր են առաջացել, դա դեռ չի նշանակում, որ շենքը վտանգ է ներկայացնում, կամ չի ներկայացնում: Չկա մասնագիտական գնահատական»:

Հիմա քննարկում են արդյոք դպրոցի՝ ոչ բարվոք վիճակում շենքը հիմնանորոգման ենթակա՞ է, թե՞ ոչ: Վարչության պետը, դասարանների ծանրաբեռնվածության թեթևացման համար բացի նոր մասնաշենքի կառուցումից անհրաժեշտ է համարում նաև մարզադահլիճի կառուցումը, քանի որ երեխաները ֆիզկուլտուրա անում են դրսում, եթե իհարկե եղանակը բարենպաստ է:

«Մենք համամեիտ են ծնողների, աշակերտների, ուսուցիչների հետ: Ոչ միայն համամաիտ ենք, այլև նրանց կողքին կանգնած ենք: Այնտեղ նաև գույքի ու դասագրքերի խնդիր կար, այդ հարցերը լուծվել են: Այստեղ չկան տարբեր կողմեր, կա մեկ կողմ՝ ինչպես անել, որ խնդիրը լուծվի»,-ասաց նա: