Ձեր վստահելի աղբյուրը

Աֆրիկյանների ակումբի շենքի ապօրինի ապամոնտաժումն այսօր շարունակվել է: Վերջին օրերին ընթացքող աշխատանքների արդյունքում շենքի արդեն մոտ 10 տոկոսն ապամոտնաժվել է:

Այսօր առավոտից ընթացող աշխատանքները դադարեցնելու հերթական պահանջով է ներկայացել Մշակույթի նախարարությունը: Եթե նախորդ անգամներին նախարարության ներկայացուցիչը գալիս էր և տեղում հրահանգում դադարեցնել, ապա այսօր արդեն պաշտոնական գրություն է եղել:

Ավելին` աշխատանքների ապօրինի լինելու փաստով Վարչական դատարան դիմում է ներկայացվել քաղաքացիների կողմից, որում նաև աշխատանքները դադարեցնելու միջնորդություն կա:

Շինաշխատանքներն իրականացնող ընկերությունը, առանց նախարարությանը ապամոնտաժման մեկնարկի մասին տեղեկացնելու և դրա թույլտվությունը ստանալու, համառորեն քանդում է հանրապետական նշանակության հուշարձանը, նույն համառությամբ էլ իրավապահ մարմինները չեն կանխում անօրինությունը:

Նույն Աֆրիկյանների շենքի համար պայքարող քաղաքացիներից մեկն օրերս, երբ որպես բողոքի նշան փորձել էր պոկել շենքը փակած պարսպի վրայի պաստառը, բերման ենթարկվեց ուրիշի գույքը վնասելու կասկածանքով:

Նկատենք, որ քաղաքացին բողոքում էր հուշարձանի ապօրինի քանդման դեմ: Իսկ ապօրինի բառն օգտագործում ենք, քանի որ պատասխանատու մարմինը` Մշակույթի նախարարությունն էր այդպիսի գնահատական տվել ու պահանջել դադարեցնել աշխատանքները:

Ամեն անգամ, երբ ոստիկանությունից փորձում ենք ճշտել, թե ինչն է պահպանում ոստիկանության աշխատակիցը հուշարձանի տարածքում, պատասխանը մեկն է` «հասարակական կարգը»:

Այսօր, երբ հերթական անգամ փորձեցինք ոստիկանության լրատվական ծառայությունից հասկանալ, թե ինչու իրավապահ մարմինը չի միջամտում հուշարձանի ապօրինի քանդմանը` բերելով վերը նշված փաստարկները, հեռախոսի այն կողմից խնդրեցին գրավոր հարցում ուղարկել:

Մինչ գրավոր գրություններ են պահանջում լրատվամիջոցներին` անհայտ դիտավորությամբ, փաստը մնում է փաստ` հուշարձանն ապօրինի քանդվում է:

Ընդ որում` տվյալ դեպքում կոնկրետ տարածք ահազանգով գնալու անհրաժեշտություն չկա, քանի որ ոստիկանության ներկայացուցիչներն քանի օր ու գիշեր «տեղում» հսկում են, որ բացի ապամոնտաժումն անող բանվորներից այլ մարդիկ չմտնեն շինհրապարակ: Ավելի լավ, քան նրանք, որևէ մեկը չի տեսնում, թե ինչպես է քանդվում հուշարձանը:

Նույն հարցի պատասխանը փորձեցինք ստանալ նաև Գլխավոր դատախազությունից. Այստեղից պատասխանը ևս նույնն էր` դիմեք գրավոր: Նկատենք, որ նույն դատախազությունը օրերս նույն հուշարձանի քանդման վերաբերյալ հանցագործության մասին հաղորդում է ստացել, սակայն դեռ անաձագանք է մնում:

Նկատենք վաելին` դատախազությունում գործ է հարուցվում 4 ծառ ապօրինի հատելու փաստի առթիվ, մինչդեռ այս դեպքում լուռ են: Գրավոր հարցադրում են ուզում, երբ մեկ այլ պետական կառույցի` մշակույթի նախարարության գրությունը առկա է`  «շինարարների կողմից ներկայացված փաստաթղթերը թերի են, ինչի վերաբերյալ գործակալության մասնագետների դադարեցման հրահանգը չի կատարվել: Ոչ լիարժեք փաստաթղթերի բացակայությունը կարող է վտանգել հուշարձանի պահպանությունը»:
 

Մնում է հորդորել, որ իրավապահ մարմինները նույն նախանձախնդրությամբ, ինչպես որ հասարակական կարգը, ուրիշի գույքը և այլն են պաշտպանում, վերջապես պաշտպանեն հանրապետական նշանակության 130-ամյա հուշարձանը:

Երեք պետական կառույց չեն նկատում իրար` դատախազություն, ոստիկանություն, մշակույթի նախարարություն: Այս պահին ոչինչ չի մնում անել, քան արձանագրել, որ իրավապահ մարմիններն անգործության են մատնված ու ևս մեկ անգամ նրանց հաղորդել հանցագործության մասին:

Նախորդող հրապարակումներ`

Աֆրիկյանների ակումբի շենքի ֆասադային մասում վերսկսվել են առանց թույլտվության աշխատանքները

Ինչ է կատարվում Աֆրիկյանների շենքի ներսում (Տեսանյութ)

Աֆրիկյանների ակումբի շենքի ֆասադից քարեր են հանում

«Հին Երևան» նախագծի հեղինակի վերաբերմունքը` մի քանի հարցի պատասխանով