Կարծիքներ Զվարթնոցի Կլոր շենքը քանդելու որոշման շուրջ
Կառավարությունը, ի հեճուկս Հանրային խորհուրդում, սոցիալական ցանցերում և լրատվամիջոցներում երկար ժամանակ տևած քննարկումներին ու ճարտարապետական արժեքավոր նմուշի քանդման վերաբերյալ բացասական կարծիքներին, հավանություն էր տվել կառավարչի առաջարկին: Այսօր արդեն Հայաստանի Քաղավիացիայի գլխավոր վարչության պետ Արտյոմ Մովսեսյանը հայտարարում է, որ «Զվարթնոց» օդանավակայանի հին մասնաշենքը հաստատ կքանդվի:
Ճարտարապետների միության նախագահ Մկրտիչ Մինասյանը նման որոշումից եզրահանգման է եկել` «ճարտարապետների ու առհասարակ հանրության կարծիքը շարունակում է լսելի չլինել»:
«Չգիտեմ` սրանից ավելի ինչ պետք է արվեր: Այդքա՞ն շտապ էր դա: Պետք է առաջարկված բոլոր հնարավոր տարբերակները քննարկվեին: Չգիտեմ` ինչ ասել: Մեր կարծիքն այն էր, որ օդանավակայնն իր ռեսուրսները չի սպառել և դրա շուրջ տարբեր առաջարկներ կային: Հիմա եթե միակ տարբերակն այն է, որ ամբողջությամբ քանդվի և մեծացվի նոր օդանավակայանը, ապա դա կարոելի էր առանց քանդելու էլ անել»,- ասաց նա:
Ճարտարապետների միությունն օրերս նաև բաց նամակ է հղել ՀՀ Նախագահին և Էռնեկյանին ու խնդրել մեկ անգամ ևս քննարկել հարցը, որից հետո միայն որոշում կայացնել. «Հիմա եթե երկու օր առաջ դիմել ենք և Կառավարությունն այսօր ասում է, որ միակ տարբերակը քանդելն է, չգիտեմ ինչ ասել, արդեն»:
Ինչ վերաբերում է վարչապետի առաջարկին` թե կարելի է այգի ստեղծել և այնտեղ տեղակայել ճարտարապետական հուշարձանները, ապա Մկրտիչ Մինասյանը նկատում է, որ նման բաներ աշխարհում կան, փոքրիկ մակետի նման քաղաքներ են սարքում, որ ցույց տան ինչ է եղել, բայց դրանք բոլորովին տարբեր բաներ են: «Քանդե՞լ և մակետը՞ սարքել, կամ ցուցադրվել ինչքա՞ն շենք է քանդվել…. Չգիտեմ»,- ասաց Ճարտարապետների միության նախագահը:
Ճարտարապետ Արսեն Կարապետյանը ևս շատ վատ է արձագանքում կառավարության որոշմանն ու Արտյոմ Մովսեսյանի այսօրվա հայտարարությանը: «Ես առհասարակ չեմ հասկանում, թե Քաղավիացիայի վարչությունն ի՞նչ իրավունք ունի նման հարցեր լուծելու: Եվ հետո, կառավարության մոտեցումը զավեշտի է հասնում` ինչ-որ այգի սարքել` մանրակերտերով և այլն: Դա արդեն ծաղրանքի նման բան է: Կարելի է եկեղեցիներին էլ քանդել, մանրակերտներ շարել: Դա պրոֆեսիոնալ մոտեցում էլ չի: Բառ չեմ գտնում, դրան ի՞նչ ասեմ»,- ասաց նա:
Ճարտարապետի բնորոշմամբ, բուն խնդրի մասին, որ մենք ունենք ինչ-որ ժառանգություն և թեև դժվար է, բայց գոնե պետք է փորձել միջոցներ գտնել պահպանելու, ընդհանրապես խոսք չկա: «Ընդհանրապես հասկանալի չէ, թե ինչի հիման վրա են որոշում ընդունում: Այսինքն, իրականում հասկանալի է, կոնկրետ նյութական շահերի մասին է խոսքը: Ժառանգությունը, որպես այդպիսին, փաստորեն Հայաստանում արդեն արժեք չի ներկայացնում»,- հավելեց Արսեն Կարապետյանը:
Ամբողջ հանրությունը, Ճարտարապետների միությունը, Հանրային խորհրդի համապատասխան ենթահանձնաժողովները և Հանրային խորհուրդն առհասարակ շատ վատ են վերաբերում Զվարթնոցի Կլոր մասնաշենքի քանդմանն ու բացասական կարծիքը հայտնել են վաղուց:
«Դա խայտառակություն է»,- մեզ հետ զրույցում ասաց ՀԽ քաղաքաշինության և ճարտարապետության ենթահանձնաժողովի նախագահ Գրիգոր Ազիզյանը և հավելեց,- «Բայց հիմա ես չեմ գտնում, որ Կառավարությունը միանշանակ է ասել, որ դա պետք է քանդվի: Կառավարությունը հաստատել է մաստեր-պլանի տնտեսական մասը, բայց ոչ շենքի քանդումը: Վարչապետն ասել է` քննարկել ևս մեկ անգամ ճարտարապետների հետ, հո՞ ճարտարապետները հենց այնպես չեն ասում, որ պետք չէ քանդել: Իսկ այդ այգին բոլորովին այլ գաղափար է»:
«Զվարթնոց» օդանավակայանի հին մասնաշենքի քանդման վերաբերյալ Արտյոմ Մովսեսյանի հայտարարությանը Գրիգոր Ազիզյանն այսպես արագանքեց. «Մովսեսյանը չարաչար սխալվել է»:
Նա շեշտեց, որ իրենք պայքարելու են մինչև վերջ:
Հիշեցնենք, որ անդրադառնալով խնդրին, վարչապետ Տիգրան Սարգսյանը կառավարության նիստի ժամանակ ասել էր, թե հասկանալի է, որ կլոր մասնաշենքը ֆիզիկապես քայքայված վիճակում է և նկատել, որ փորձագետների գնահատականների համաձայն` պահանջվում է 15-20 մլն դոլարի ներդրում:
«Դա չափազանց ծախսատար գործառույթ է, դրա համար առաջարկվում է ճարտարապետական այլ լուծումներ այս հարցի շուրջ: Սովետական մոդեռնիզմի մասնաշենք է, բնականաբար մեր ճարտարապետները այդ առումով ներկայացնում են լրացուցիչ քննարկման անհրաժեշտության խնդիրը, և մենք պետք է նույնպես դիմենք կոնցեսիոներին, որպեսզի այդ լրացուցիչ քննարկումները տեղի ունենան և գտնվեն այնպիսի լուծումներ, որպեսզի պատմամշակութային, ճարտարապետական արժեք ներկայացնող հուշարձանները մենք կարողանանք ինչ-որ ձևով պահպանել»,- ընդգծել էր Տիգրան Սարգսյանը:
Ըստ նրա, կա հետաքրքիր առաջարկ, որը նույնպես իմաստ ունի քննարկել: Մասնավորապես, ըստ վարչապետի, առաջարկվում է օդանավակայանի տարածքում կառուցել մի ճարտապետական լուծումով այգի, որտեղ կտեղակայվեն ճարտարապետական հուշարձանները.«Ժամանակին մեր քաղաքի դեմքը հանդիսացող ճարտարապետական կոթողները կարող են այդ այգում տեղակայվել»:
Նախորդիվ`
«Զվարթնոց» օդանավակայանի հին մասնաշենքը հաստատ կքանդվի. Արտյոմ Մովսեսյան
«Զվարթնոցի» հին շենքի մասին ևս մեկ անձնական կարծիք. Արտյոմ Մովսեսյան
Հանրային խորհուրդը դեմ է «Զվարթնոցի» հին շենքի քանդմանը. «Հիմնավոր փաստարկներ չկան»
Պետք է լուծումներ գտնել, որ «Զվարթնոցի» հին շենքը իր երկրորդ կյանքն ապրի. Մկրտիչ Մինասյան
«Կոլիզեյը կրկնակի կռիսանոց է, բայց պահում են». Քննարկում՝ «Զվարթնոցի» հին շենքի հարցի շուրջ
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
