Ձեր վստահելի աղբյուրը

Քեսաբի հայկական եկեղեցին զինյալներն իրենց հավաքատեղի են սարքել: Այս մասին Panorama.am-ին տեղեկացրեց Լաթաքիայում ապաստանած քեսաբցի Հասմիկ Մանջիկյան-Բերբերյանը:

«Թուրքական սահմանը, որ շատ մոտ էր Քեսաբին, ամբողջությամբ բացել են, փշալարարը՝  հանել: Թուրքիայից մեքենաներով գալիս են, կողոպտում են տները և տանում մեր ունեցվածքը: Ոչ մեկ իրենց ոչինչ չի ասում, հանգիստ կողոպտում են»,- ասաց նա՝  հավելելով, որ կողոպտիչները նաև տներ են այրում:

Մարտի 22-ին զինված խմբավորումների հարձակումներից պաշտպանելու համար Սիրիայի հայաբնակ Քեսաբից տարհանված հայերը Լաթաքիայում օգնություն են ստանում, նախնական տվյալներով 600 ընտանիք է տարհանվել:

«Ամեն ինչ անում ենք, որպեսզի  օգնության հասնենք: Մարդիկ դուրս են եկել և իրենց հետ ոչինչ չեն վերցրել՝ ոչ հագուստ, ոչ առաջին անհրաժեշտության պարագաներ: Այն հայերը, ովքեր ազգականներ ունեն, ապաստանել են նրանց տանը, մեծամասնությունը՝ հայկական եկեղեցում և հայկական կառույցներում: Մենք հիմա առաջին հերթին մարդասիրական օգնություն ենք կազմակերպել՝ մատրասներ, ծածկոցներ և տնտեսական պարագաներ»,- Panorama.am-ի թղթակցի հետ զրույցում ավելի վաղ ասել էր Դամասկոսի Հայոց թեմի առաջնորդ Տ. Արմաշ եպիսկոպոս Նալբանդյանը:

ՀՀ Նախագահ Սերժ Սարգսյանը նախօրեին հայտարարել է, որ Սիրիայում Հայաստանի Հանրապետության դեսպանատունն աշխատում է քեսաբահայությանն աջակցելու համար անհրաժեշտ միջոցառումների ծրագրի վրա, որն իրականացվելու է ամբողջ ծավալով:

ԱԳՆ-ից Panorama.am-ին հայտնել էին, որ Քեսաբից տարհանված հայերին Հայաստանի կողմից օգնություն տրամադրելու ուղղությամբ աշխատանքներ տարվում են, որոշակի քայլեր են ձեռնարկվում, բայց դրանք հրապարակման ենթակա չեն: Իսկ Արցախի նախագահի մամուլի խոսնակ Դավիթ Բաբայանն ասել էր, որ եթե Քեսաբի հայերը ցանկություն ունեն, ապա Արցախը պատրաստ է նրանց ընդունել:

Քեսաբ շրջանի վրա թուրքական սահմանի կողմից սկսված հարձակումից հետո իրավիճակին հետևում է նաև Մեծի Տանն Կիլիկիո կաթողիկոս Արամ Ա-ն: Վեհափառը կապեր է հաստատել Հալեպի, Լաթաքիայի, Դամասկոսի և Լիբանանի հոգևոր, համայնքային և քաղաքական պատասխանատուների հետ և խորհրդակցություններ անցկացրել։ Արամ Ա-ն հանդիպել է Լիբանանում Սիրիայի դեսպանին, ով տեղեկացրել է, որ, ըստ հստակ տեղեկությունների, Թուրքիան քաջալերել է զինյալների մուտքը Քեսաբ ու ծանր զենք է տրամադրել նրանց: Դեսպանի խոսքով, ամեն բան արվում է կայունություն ապահովելու համար: 

Նշենք, որ Սիրիայի նախագահ Բաշար ալ Ասադի եղբայրը` Հիլյալ Ասադը, որ գլխավորում էր Լաթաքիայի ռազմական ստորաբաժանումները, կիրակի օրը զոհվել էր Քեսաբի պաշտպանության ժամանակ: Բաշար ալ Ասադը  վերահաստատել է Քեսաբում անվտանգությունն արագորեն վերահաստատելու հանձնառությունը:

Նախորդիվ՝

Հայաբնակ Քեսաբի վրա հարձակման մեջ չեչեննե՞ր են ներգրավված

«Քեսաբ ներխուժումը հայության` մասնավորապես սիրիահայ համայնքի դեմ ուղղված քայլ էր»

Սիրիահայ. Ամեն վայրկյան սպասվում է Լաթաքիայի դեմ հարձակումը

Առաջ եկող զուգահեռները սթափեցնող պետք է լինեն. Սերժ Սարգսյանի հայտարարությունը` Քեսաբի իրադարձությունների վերաբերյալ

Քեսաբի հայերին օգնություն է անհրաժեշտ, հայկական կողմը քայլեր ձեռնարկում է