Անահիտ Թարխանյան. «Զվարթնոցի» հին շենքի երեսպատումը բարբարոսաբար քանդվել է, բայց շենքը սեյսմակայուն է
«Զվարթնոց» օդանավակայանի հին (կլոր) շենքի վերաբերյալ այսօր հերթական քննարկումն էր Հանրային խորհրդում, այս անգամ հարցը Մշակույթի ենթահանձնաժողովի նիստի օրակարգում էր:
Շինության համահեղինակ Արթուր Թարխանյանի դուստրը՝ Անահիտ Թարխանյանը, քննարկման ժամանակ հայտնեց, որ 2003 թ-ին ևս այս հարցը բարձրացվել է, սակայն համահեղինակները դատական ատյաններում հասել են այն բանին, որ ընկերությունը իրավունք չունի քանդելու կամ որևէ փոփոխության ենթարկելու շենքը:
«Քանի որ օերերս ընկերությունը հրաժարվեց իր պարտավորություններից, անհրաժեշտություն եմ համարում ներկայացնել կոնցեսիոների և ՀՀ կառավարության միջև 2001-ին կնքված պայմանագիրը, որով տարածքը 30 տարով վարձակալել են` պարտավորվելով պատշաճ օգտագործել շենքը»,- ասաց նա:
Ըստ պայմանագրի`ընկերությունը ցանկություն ունենալու դեպքում կարող է ներդրումներ և շինարարություն իրականացնել: Այն, ինչը նոր կկառուցվի, կհանդիսանա ընկերության սեփականությունը, իսկ օդանավակայանի հին շենքը, որպես ստրատեգիկ նշանակություն ունեցող, մնում է պետությանը: «Շենքի երեսպատումը բարբարոսաբար քանդվել է, արմատուրաները երևում են, բայց դա կապ չունի սեյսմակայության հետ: Պետք է ուղղակի քերել պատերն ու սվաղել: Գոյություն ունեն լուրջ սեյսմիկ հանձնաժողովներ, նրանք էլ կարող են եզրակացություն կազմել»,- ասաց Անահիտ Թարխանյանը և հավելեց, որ շենքը հուշարձան է, ժամանակին էլ ներառված է եղել պահպանվող հուշարձանների ցանկում:
«Իրենց կողմից է քանդվել, երբ սկսեցին շահագործել այն: Վերջերս հայտարարվեց Մաքսային միությանն անդամակցելու մասին: Այն կարելի է օգտագործել որպես օդանակավակայան, որը կսպասարկի ներքին և ռեգիոնալ թռիչքները դեպի ԼՂՀ, Մոսկվա, Սանկտ-Պետերբուրգ, Ղազաղստան, Բելառուս, որոնք եկամուտ կբերեն ցանկացած կազմակերպությանը, որը կցանակա վարձակալել տարածքը»,- նշեց նա:
Անահիտ Թարխանյանը, ով նաև շենքի հեղինակային իրավունքների իրավահաջորդներից մեկն է, ընդգծեց, որ շինությունը ժամանակին կառուցվել է որպես ստրատեգիկ նշանակություն ունեցող, և այսօր էր սեյսմակայուն է:
Նա նաև առաջարկեց, որ շինության համար նոր վարձակալողներ փնտրեն. «Եթե չեն գտնվի վարձակալողներ, ես հանդես եմ գալիս հայտարարությամբ, որ ստեղծենք հասարակական-քաղաքացիական խումբ, ովքեր կցանկանան որպես վարձակալողներ վերցնել շենքը: Ես վստահ եմ, որ մոտ տասը հոգի բարերարներ գտնվեն, որ կկարողանան վարձակյալել այն: Մենք կվերադարձնենք այն գումարները, որ կկորցնի այսօրվա վարձակալողը և կվերականգենք շենքը: Ես համոզված եմ, որ օդանավակայանը նման մեծ օգուտներ կարող է տալ: Բայց, իհարկե շինությունը մեզ պետք է հանձնեն այն պայմաններով, որով որ տվել են կոնցեսիոներին, այսինքն` առանց պայմանների ու պարտավորությունների: Եթե ներդրողներ չլինեն, քաղաքացիական նախաձեռնողներն, արդեն պատրաստ են»,- եզրափակեց նա:
Հիշեցնենք, որ Հայաստանի քաղավիացիայի գլխավոր վարչությունը վերջերս դիմել էր Հանրային խորհուրդ` տեղեկացնելով, որ ՀՀ կառավարությունն ու «Զվարթնոց» օդանավակայանի կառավարիչ «Արմենիա միջազգային օդանավակայաններ» ՓԲԸ-ն քննարկում են օդանավակայանի առաջիկա 5 տարիների զարգացման խնդիրները, որի շրջանակներում անհրաժեշտություն է առաջացել վերջնական գնահատական տալու հին ուղևորային համալիրի հետագա պահպանման կամ քանդման խնդրին:
Քաղավիացիայի վարչության կողմից Հանրային խորհրդին առաջարկվել էր համատեղ քննարկել հարցը, որպեսզի մինչև վերջնական որոշում կայացնելը հասկանալի լինեն այն գնահատականներն ու մոտեցումները, որոնք առկա են համալիրի նկատմամբ հանրության և ոլորտի մասնագետների կողմից:
Հանրային Խորհրդի ֆինանսաբյուջետային և տնտեսական հարցերով հանձնաժողովի ավիացիոն հարցերով ենթահանձնաժողովը խիստ բացասական որոշում է կայացրել «Զվարթնոց» օդանավակայանի թիվ 1 շենքի քանդման առաջարկության վերաբերյալ:
Շինությունը քանդելուն դեմ է նաև Երևանի քաղաքապետարանին կից քաղաքաշինական խորհուրդը, իսկ Հանրային Խորհրդում օրերս տեղի ունեցած քննարկման ժամանակ էլ ճարտարապետները միաձայն կարծիք հայտնեցին, որ շենքը հայ և համաշխարհային ճարտարապետության մեջ մեծ արժեք ունի և չի կարելի քանդել:
Երևանի «Զվարթնոց» միջազգային օդանավակայանը հիմնադրվել է 1961թ., նոր շենքը (կլոր) նախագծվել է 1974թ., շահագործման է հանձնվել 1982 թվականին, ճարտարապետներն են` Ա. Թարխանյանը, Ս. Խաչիկյանը, Ժ. Շեխլյանը, Լ. Չերքեզյանը: Օդանավակայանի նոր մասնաշենքը շահագործման է հանձնվել 2011-ի աշնանը:
Նախորդիվ`
Պետք է լուծումներ գտնել, որ «Զվարթնոցի» հին շենքը իր երկրորդ կյանքն ապրի. Մկրտիչ Մինասյան
«Կոլիզեյը կրկնակի կռիսանոց է, բայց պահում են». Քննարկում՝ «Զվարթնոցի» հին շենքի հարցի շուրջ
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
