Ձեր վստահելի աղբյուրը

Այսօր Շիրակի մարզի ընդհանուր իրավասության դատարանում Գյումրու նախկին քաղաքապետ Վարդան Ղուկասյանի դստեր փեսացու Կարեն Եսայանի սպանության գործով դատավարության ժամանակ արտակարգ միջադեպ է տեղի ունեցել. Վարդան Ղուկասյանի կողմնակիցները սպառնացել են գործով ամբաստանյալ Հարություն Սարգսյանի պաշտպան, ՀՀ Փաստաբանների պալատի փաստաբան Լուսինե Սահակյանին:

«Կոնկրետ անուն-ազգանունները չեմ կարող ասել, որովհետև չեմ ճանաչում, բայց ասացին, որ Վարդան Ղուկասյանի կողմնակիցներն են: Դատարանում սկսեցին ահաբեկել ինձ, ասելով` մազերդ կպոկեմ, դատարանից դուրս էկար, գլուխդ կպոկեմ և այլն ու շատ ագրեսիվ», -Panorama.am-ի թղթակցի հետ զրույցում պատմեց Լուսինե Սահակյանը:

Դեպքը տեղի է ունեցել մասնավորապես, մտավոր խնդիրներ ունեցող և գործով առանցքային վկա համարվող Հակոբ Մնացականյանի հարցաքննության ժամանակ: Սահակյանի ներկայացմամբ, Մնացականյանը մտավոր թերզարգացած երեխա է, և պաշտպանական կողմը դատավոր Մարտին Սարոյանին փաստաթուղթ է ներկայացրել, որ Մնացականյանը օժանդակ դպրոցի սան է եղել և օլիգոֆրենիա հիվանդությամբ է տառապում, ինչպես նաև համապատասխան բնութագիր այն մասին, որ նրա ընկալումները թույլ են: «Մինչև դատարանի դահլիճ գալը, մենք նկատեցինք, որ նրա նկատմամբ ճնշում է գործադրվում` դողում էր ամբողջ մարմնով: Հետո արդեն հարցաքննության ժամանակ պարզ դարձավ, որ նա լրիվ մտավոր թերզարգացած երեխա է և չի կարող ներկայացնել այն ամենը, ինչ իբրև թե գրել է նախաքննության ընթացքում: Բացի դրանից, չի էլ կարողանում խոսել, իր փոխարեն խոսում էր մորաքույրը», -ներկայացրեց Լուսինե Սահակյանը:

Փաստաբանի խոսքով, իր նկատմամբ դատարանում հնչեցված սպառնալիքը հնարավոր է` փորձ էր վախեցնել նաև վկա Հակոբ Մնացականյանին: Հնչեցված սպառնալիքների կապակցությամբ Լուսինե Սահակյանը միջնորդություն է ներկայացրել դատարանին` պարզել` ովքեր են այդ անձինք և համապատասխան միջոցներ ձեռնարկել: Սակայն, ինչպես փոխանցեց տիկին Սահակյանը, դատարանը որևէ միջոց չի ձեռնարկել:

Այս տարվա հունվարի 15-ից մեկնարկած Հարություն Սարգսյանի դատավարությունը Լուսինե Սահակյանի գնահատմամբ անկարգ է ընթանում: «Դատարանում կարգը բացարձակ չի պահպանվում տուժողի ներկայացուցիչը իրենց թույլ են տալիս անվայել արտահայտություններ կողմի հասցեին և բազմաթիվ մեր պահանջները, որպեսզի դատարանը կիրառի դատական սանկցիա, որպեսզի դատարանում կարգ ու կանոն պահպանվի, որպեսզի թույլ չտա, որ դատարանի դահլիճում անձինք խոսեն, սակայն դատարանը ոչինչ չի ձեռնարկում», -կարծիք հայտնեց Լուսինե Սահակյանը` նշելով նաև, որ դատական նիստերը անհարկի ընդմիջվում են:

Այսօրվա դատական նիստը, քանի որ վկան արդեն վատ էր զգացել իրեն մեղադրող կողմի միջնորդությամբ դարձյալ հետաձգվել է մինչև ապրիլի 15-ը: Լուսինե Սահակյանն ասաց, որ դատավորը հաշվի չի առել այն հանգամանքը, որ այդ օրը պաշտպանական կողմը մեկ այլ գործով դատական նիստ ունի: «Մենք դատարանում հայտարարել ենք, որ այդ օրը մենք հնարավորություն չունենք ներկայանալ դատական նիստին», -ասաց փաստաբանը:

Մեր զրուցակցի խոսքով, դատարանը նաև հաշվի չի առել պաշտպանական կողմի միջնորդությունը ըստ էության առողջական խնդիրներ ունեցող վկա Հակոբ Մնացականյանին դատակոչվածների ցանկից հանելու վերաբերյալ:

Նշենք, որ գործով վկա են նաև Գյումրու նախկին քաղաքապետ Վարդան Ղուկասյանն ու նրա դուստրը` Մանյա Ղուկասյանը, որոնք դեռ մարտի 27-ից ծանուցագրով կանչվել են դատարան վկայություն տալու համար, բայց մինչև այսօր չեն ներկայացել նիստին:

Հիշեցնենք` Վարդան Ղուկասյանի փեսան` Կարեն Եսայանը սպանվել էր իր նշանադրությունից առաջ, ապրիլի 12-ին: Սպանության համար Հարություն Սարգսյանին, որը ոստիկանության Անիի տարածաշրջանի նախկին պետ Սամվել Սարգսյանի որդին է, մեղադրանք է առաջադրվել Քր. օրենսգրքի 104 հոդվածի 1-ին մասով՝ դիտավորյալ սպանություն և 188 հոդվածի 1-ին մասով՝ ապօրինի ձեռնարկատիրություն: Մեղադրանքի ծավալից նախաքննության ընթացքում հանվել էր Քր. օրենսգրքի 235 հոդվածով մեղադրանքը՝ ապօրինի զենք կրելու, պահելու վերաբերյալ:

Հարակից հրապարակումներ. «Նախկին ոստիկանապետի որդին հանցակիցներ է ունեցել». Նոր մանրամասներ Վ. Ղուկասյանի փեսայի սպանության գործով

Ղասաբ Բաբակեխյանի ձեռքի տակով անցնելուց հետո գլխիս վրա ուռուցքներ են հայտնվել. Նախկին ոստիկանապետի որդի