Ձեր վստահելի աղբյուրը

«Այսօր ես համարվում եմ ժամանակակից, իմ ասպարեզում առաջատար, սիրված նկարչուհի, զբաղվում եմ գիտությամբ (մանկ. գիտ. դոկտոր), վարում եմ հասարակական լայն գործունեություն (ղեկավարում եմ Խ. Աբովյանի անվան ՀՊՄՀ դիզայնի և դեկորատիվ - կիրառական արվեստի ամբիոնը) և ամենակարևորը պահպանում եմ ավանդական վերաբերմունք ընտանիքիս հանդեպ: Ինքնության առումով ավելի հայ եմ, քան զտարյուն որոշ հայեր: Ժառանգել եմ հորս (ՀՀ վաստակավոր նկարիչ, հայկական ժամանակակից գոբելենի հիմնադիրն Կարապետ Եղիազարյան) պատգամը և նոր շրջափուլի մեջ եմ դրել նրա արվեստը` հետևելով XX դարի ավանգարդիստական ոճամտածողությանը: Հայրս ֆրանսիական գոբելենը դարձրեց հայկական, իսկ ես հայկական գոբելենը նորից վերընծայեցի համաեվրոպական տիրույթներին` չխաթարելով հայի էթնիկ դեմքը և ազգային արժեքների պահպանումն ու փոխանցումը»,- ասել է գոբելենագործ Անուշ Եղիազարյանը:

Արվեստագետ Ա. Եղիազարյանը (1965 թ. Երևան) 2003թ. արժանացել է դոցենտի կոչման: 2008թ. պաշտպանել է դոկտորական ատենախոսություն Խ. Աբովյանի անվան հայկական պետական մանկավարժական համալսարանում և արժանացել մանկավարժական գիտությունների դոկտորի գիտական աստիճանի, 2011թ. արժանացել է պրոֆեսորի կոչման: Հեղինակ է բազմաթիվ հոդվածների, մեթոդական ձեռնարկների, մենագրությունների, պատկերագրքերի: Մասնակցել է բազմաթիվ ցուցահանդեսների Հայաստանում և նրա սահմաններից դուրս: Ունեցել է անհատական ցուցահանդեսներ Երևանում և արտասահմանում:

Անուշ Եղիազարյանի կարծիքով, ինքն այլ մասնագիտություն ընտրել չէր էլ կարող, քանի որ հայրը` Կարապետ Եղիազարյանը հայ ժամանակակից գոբելենագործության հիմնադիրներից է:

«Ես չեմ ընտրել իմ արվեստը, այն իմ արյան կանչով է: Այս արվեստն իմ կենսակերպն է, այն սիրում եմ սուբլիմացիայի աստիճանի»,- ասել է գոբելենագործը (աղբյուրը՝ bravo.am):

Անուշ Եղիազարյանը ժամանակակից գոբելենագործության վառ ներկայացուցիչներից է, չնայած նրան խորթ չեն ոչ հայկական ավանդական գորգագործությունը, ոչ դասական արևմտյան եվրոպական դպրոցը: Նրա աշխատանքներում գերակշռում է ավանգարդիստական ոճը:

Նկարներ

Հայկական արվեստ շարքը նպատակ ունի նորելու մեր հիշողությունն ու հարգանքը` հանդեպ հայ արվեստի վարպետների ու դասականների:

Շարքի նախորդ հրապարակումները`

«… Իմ նկարները ես եմ»… Հասմիկ Ավետիսյան (լուսանկարներ)

ՄԱԿ-ի կազմակերպված ցուցահանդեսում նրա կտավը լավագույնն է ճանաչվել... Վեսո (լուսանկարներ)